გათამაშების ცხრილი
#გუნდითამაშიმოგებაფრეწაგებაგატანილიმიღებულისხვაობაქულა
1 დილა 30 19 7 4 50 21 29 64
2 დინამო ბათუმი 30 18 4 8 40 24 16 58
3 დინამო თბილისი 30 17 7 6 56 28 28 58
4 სპარტაკი 30 16 5 9 47 37 10 53
5 ჩიხურა 30 13 7 10 39 36 3 46
6 სამტრედია 30 13 6 11 40 31 9 45
7 შუქურა 30 11 8 11 36 38 -2 41
8 ტორპედო 30 10 11 9 39 33 6 41
9 გურია 30 10 9 11 38 43 -5 39
10 კოლხეთი 30 9 10 11 31 31 0 37
11 მერანი 30 9 9 12 29 33 -4 36
12 ზუგდიდი 30 8 9 13 24 45 -21 33
13 სიონი 30 9 5 16 32 45 -13 32
14 მეტალურგი 30 6 8 16 25 46 -21 26
15 ვიტ ჯორჯია 30 7 5 18 27 40 -13 26
16 ზესტაფონი 30 6 8 16 40 61 -21 26


თამაშები
XXX ტური 22.05.2015 17:00
მეტალურგი 1:1 ტორპედო
1:0 რევაზ ბარაბაძე 42' 1:1 ოთარ კვერნაძე 80'
მატჩის შესახებ
შეხვედრა საკმაოდ კარგი სანახავი გამოდგა და დაძაბულობამ პიკს მატჩის ბოლოს მიაღწია. პირველი 45 წუთი ქუთათურთა სრული ტერიტორიული და სათამაშო უპირატესობით წარიმართა და მათ გატანა არაერთხელ მართებდათ. გადამწყვეტ ფაზაში განსაკუთრებით ფორვარდი ვახტანგ კვარაცხელია სცოდავდა. 27 წლის თავდამსხმელის დარტყმული ჯერ კარის ხაზიდან გიორგი ჩიკვაიძემ გამოიტანა, შემდეგ უკვე 3 მეტრიდან ბურთს კარში ერთი შეხებით გზავნიდა, თუმცა აქაც ვერ ივარგა, ბოლოს კი მეკარე გიორგი ნადირაძემ დაასწრო. ერთ ეპიზოდში კარგი მომენტი გამოცდილ შოთა ბაბუნაშვილსაც ჰქონდა, მაგრამ ვეტერან ფეხბურთელს ოდნავ სიზუსტემ უმტყუნა. ვერ გაიტან, გაგიტანენო - ზუსტად ასე დაემართა “ტორპედოს”. რუსთაველთა ერთ-ერთი იშვიათი იერიშისას სტუმრები საკუთარ საჯარიმოსთან დაჯარიმდნენ, მარცხენა ფლანგიდან ჩიკვაიძის შესრულებულ სტანდარტზე კი ყველას ტანმაღალმა რევაზ ბარაბაძემ დაასწრო და თავისი გუნდი წინ გაიყვანა.

მეორე ტაიმში “მეტალურგმა” მთელი გუნდით უკან დაიხია, თანაც მათ უკვე იცოდნენ, რომ “ვიტ ჯორჯია” გორში მარცხდებოდა და ასეთ შემთხვევაში ვარლამ კილასონიას ბიჭებს ქულაც ხელს აძლევდათ. მასპინძლები მხოლოდ კონტრშეტევაზე ეძებდნენ თავიანთ ბედს და 56-ე წუთზე მეორე გოლის გატანასთანაც ახლოს იყვნენ - ჩიკვაიძემ კარგად ითამაშა და 25 მეტრიდან ძლიერადაც გაისროლა, თუმცა უკეთ იმერელთა უკრაინელი კარის დარაჯი ალექსეი შევჩენკო გაისარჯა, ვინაც ბურთი კუთხურზე მოიგერია. მე-80 წუთზე “მეტალურგი” მაინც გატყდა - გოლი კი შეცვლაზე შესულმა ფეხბურთელებმა შექმნეს. მარცხენა ფლანგიდან ბუდუ ზივზივაძემ იაქტიურა და მისი გამჭოლი გადაცემა კართან ახლოს მარტო მდგომმა ოთარ კვერნაძემ დააგვირგვინა და ამ ჩემპიონატში მისი მე-10 გოლი გაიტანა - 1:1. “მეტალურგს” ეს ანგარიშიც ხელს აძლევდა და შეტევაში დიდად არ წასულა. და მაინც, 83-ე წუთზე სტადიონზე შეკრებილი მცირერიცხოვანი გულშემატკივარი აფორიაქდა - ტორპედოელთა გამოცდილი კაპიტანი მიხეილ მახვილაძე კუთხურის შემდეგ თავით ურტყამდა, მაგრამ მასპინძელთა საბედნიეროდ ბურთი ნადირაძის კარს მცირედით ასცდა. საბოლოოდ, შეხვედრა ფრედ 1:1 დასრულდა, ხოლო თბილისის “ვიტ ჯორჯიამ” “დილასთან” 0:3 წააგო, რითაც „მეტალურგმა“ პრეი ოფში თამაშის უფლება მოიპოვა. რაც შეეხება „ტორპედოს“, ქუთათურებმა 26-ე ეროვნული ჩემპიონატი სატურნირო ცხრილის შუაში დაასრულეს.
XXX ტური 22.05.2015 17:00 მეტალურგი 1:1 ტორპედო
XXIX ტური 17.05.2015 17:00
ტორპედო 0:2 შუქურა
0:1 გიორგი კუხიანიძე 60', 0:2 გიორგი გურული 65'
მატჩის შესახებ
წვიმიანი დილის შემდეგ დღის მეორე ნახევარში ქუთაისში ამინდი შეიცვალა და თამაშის დაწყებამდე მზეც გამოჩნდა. ამ სეზონში „ტორპედოს“ ბოლო საშინაო მატჩის საცქერლად ტრიბუნებზე 2 000-მდე გულშემატკივარი შეიკრიბა. თამაში თავიდანვე ქუთაისელთა, რომელთაც დისკვალიფიკაციის გამო დღეს გიორგი ქიმაძე აკლდათ, დომინირებით დაიწყო და თითქმის მთელი მატჩიც ასეთივე სცენარით გაგრძელდა. ძალთა თანაფარდობა მასპინძელთა სასარგებლოდ შესამჩნევი იყო. უგოლო პირველ ტაიმში, რომლის უმეტეს დროში თამაში „შუქურას“ ნახევარზე მიმდინარეობდა, სტუმრებს ერთადერთი საგოლე მომენტი ჰქონდათ, როცა 28-ე წუთზე მეკარესთან პირისპირ გასულმა ნუნესმა ერთ-ერთი მცველის შეცდომით ვერ ისარგებლა და კარს ააცილა. ტორპედოელთა მიერ შექმნილი სახიფათო მომენტები იმდენად ბევრი იყო, რომ მათ აღწერაზე თავს არ შეგაწყენთ. სჯობს, მატჩის ვიდეომიმოხილვაში თავად ნახოთ, რასაც ოდნავ მოგვიანებით შემოგთავაზებთ...

მეორე ტაიმის დაწყებიდან მცირე ხნით ინიციატივებს სტუმრები ფლობდნენ, თუმცა მალევე სათამაშო უპირატესობა კვლავ „ტორპედომ“ იგდო ხელთ. მიუხედავად ამისა, არარეალიზებული მომენტების გამო მასპინძლები დაისაჯნენ და ზღვისპირელებმა კონტრშეტევების შედეგად დაწინაურება და სხვაობის გაზრდაც შეძლეს. მე-60 და 65-ე წუთებზე გოლები ექსტორპედოელებმა, მეკარესთან პირისპირ გასულმა გიორგი კუხიანიძემ და გიორგი გურულმა(თავური დარტყმით) ჩაიწერეს აქტივში. 2 ხარიხა, 1 ძელი, 1 გაუქმებული გოლი, მეკარის 10-მდე გაუვნებელყოფილი და ტორპედოელთა მიერ დაახლოებით ამდენივე არაზუსტი დარტყმა. ფაქტობრივად, „ტორპედომ“ იმდენი საგოლე მომენტი შექმნა, რამდენიც მინიმუმ ბოლო 5 წლის განმავლობაში ჩატარებულ არც ერთ ოფიციალურ შეხვედრაში არ შეუქმნია, მაგრამ საწადელს მაინც ვერ მიაღწია. მთელი მატჩის განმავლობაში მიზანთან ახლოს ოთხჯერ ბაბუნაშვილი, სამჯერ კლიმიაშვილი, კვარაცხელია და ტუღუში, ორჯერ ადამაძე და კვერნაძე, თითოჯერ კი იოსელიანი, მამასახლისი, ჭელიძე, მირცხულავა და კირკიტაძე იყვნენ. ეს ის იშვიათი მატჩი იყო, როდესაც ერთი გუნდის სასტარტო შემადგენლობაში მყოფთაგან ყველას ჰქონდა საგოლე შანსი, გარდა მეკარისა. მოკლედ, ქუთაისელებმა სახიფათო მომენტების მეოცედიც კი ვერ გამოიყენეს და საბოლოოდ, მოგება „შუქურას“ დარჩა(2:0).
XXIX ტური 17.05.2015 17:00 ტორპედო 0:2 შუქურა
XXVIII ტური 13.05.2015
ზესტაფონი 0:3 (ტექ) ტორპედო
მატჩის შესახებ
XXVIII ტური 13.05.2015 ზესტაფონი 0:3 (ტექ) ტორპედო
XXVII ტური 09.05.2015 17:00
ტორპედო 1:0 სიონი
1:0 ვახტანგ კვარაცხელია 89'
მატჩის შესახებ
თუ რამდენიმეწუთიან მონაკვეთს არ ჩავთლით, მთლიანად თამაში უნალექო ამინდში მიმდინარეობდა. პირველ ტაიმში ტემპი მაღალი არ ყოფილა, თუმცა სახიფათო მომენტები ორივე კართან, უფრო მეტჯერ კი სტუმართა დასაცავ ობიექტთან იყო. „სიონი“ მხოლოდ საწყის თხუთმეტ წუთში ფლობდა სათამაშო ინიციატივებს. სტუმართან მხრიდან დაწინაურება უგულავასა და სიჭინავას შეეძლოთ, ორივე მათგანმა მიზანში ვერ მოარტყა ბურთი. მეორე ტაიმამდე ბოლნისელებს მეტი სამახსოვრო არაფერი შეუქმნიათ. „ტორპედოს“ პირველ ნომრად თამაში კი თანდათან იკვეთებოდა. მე-13 წუთზე, კლიმიაშვილმა სწრაფი დრიბლინგის შემდეგ ჭელიძე მოძებნა, რომელმაც თავის მხრივ ზივზივაძე, ბუდუმ საჯარიმოს მისადგომებიდან კარში დაარტყა, მეკარემ ბურთი დაიმორჩილა. მე-15 წუთზე, ზივზივაძის პასით მახვილი კუთხიდან იოსელიანმა დაჰკრა ბურთს, მერლანმა ამ შემთხვევაში კუთხურზე მოიგერია, რომლის კლიმიაშვილის მიერ ჩაწოდებით ადამაძემ(მან დღეს მაღალ დონეზე ჩაატარა მატჩი) საპენლტოდან დაახლოებით ისე დაარტყა თავით, როგორც თბილისის „დინამოსთან“ წინა შეხვედრაში გატანის დროს, ამჯერად კაპიტანს ჩანაფიქრი არაზუსტი გამოუვიდა. 22-ე წუთზე, იოსელიანის ჩაწოდებით ტუღუშმა ერთი შეხებით დაარტყა კარში, მეკარე ადგილზე იყო. 41-ე წუთზე კირკიტაძემ ძლიერად დაარტყა საჯარიმოს გარედან, მერლანმა ბურთი ნახტომში მოიგერია. იქამდე კი გამოსარჩევი იყო ერთი მომენტი, როცა „სიონის“ საჯარიმოს ხაზთან ქიმაძე მეტოქეს გასცდა და წაიქცა, თუმცა არბიტრმა ეპიზოდი ქუთაისელთა საწინააღმდეგოდ შეაფასა და გიორგის ყვითელი ბარათი უჩვენა, რის გამოც ტორპედოელი მომდევნო შეხვედრას გამოტოვებს. ტაიმი უგოლოდ დასრულდა - 0:0.

მეორე ტაიმი უმეტესად ქუთაისელთა კარნახით მიმდინარეობდა, თუმცა ისიც აღსანიშნავია, რომ ორ ეპიზოდში ქვემოქართლელებიც იყვნენ ახლოს ანგარიშის გახსნასთან. ერთხელ ქიმაძემ გამოაგდო ბურთი კარის ხაზიდან, ოცი წუთის შემდეგ კი, მე-80 წუთზე, გოგობერიშვილის დარტყმით რთული ბურთი მოიგერია მეკარე შევჩენკომაც. გიორგი დარასელიას შეგირდებმა ტაიმის დაწყებისთანავე აქტიურად შეუტიეს მეტოქეს და ერთმანეთის მიყოლებით რამდენიმე საგოლე მომენტი შექმნეს. ორჯერ კლიმიაშვილს უმტყუნა სიზუსტემ, ერთხელ ქიმაძეს. 55-ე წუთზე, ტუღუშის ჩაწოდებით კირკიტაძემ ხელსაყრელი ადგილიდან დაარტყა თავით, მაგრამ მიზანს ააცილა. 61-ე წუთზე, ბაბუნაშვილმა კარს მიღმა გაუშვა ბურთი, სამ წუთში კი საჯარიმოს შეგნიდან გასროლით ძელი შეაზანზარა. ტორპედოელებმა ხანგრძლივი შტურმი მოუწყვეს სტუმრებს, რომლებიც დროის გასაყვანად ყველანაირ ხერხს მიმართავდნენ. 87-ე წუთზე, ბაბუნაშვილის პასით კვარაცხელია გზავნიდა მაღალ კუთხეში ბურთს, მაგრამ მერლანმა სწრაფი რეაქციის გამოვლენით გადაარჩინა „სიონი“, თუმცა ორიოდ წუთით... 89-ე წუთი იწურებოდა და შეცვლაზე შესულმა ბაბუნაშვილმა მარჯვენა ფლანგიდან „სტანდარტი“ კარისკენ ჩააწოდა, სადაც თამაშში ასევე მოგვიანებით ჩართულმა ვახტანგ კვარაცხელიამ მცველთან ჭიდილში დაარტყა თავით და გამარჯვების მომტანი გოლიც გაიტანა - 1:0. ეს ჩვენი გუნდის პირველი სამი ქულაა მას შემდეგ, რაც ქუთაისის სტადიონს რამაზ შენგელიას სახელი მიენიჭა. ამავდროულად, პირველ წრეში ბოლნისელებთან განცდილი მარცხის გამო(0:1) რევანშიც აღებულია.
XXVII ტური 09.05.2015 17:00 ტორპედო 1:0 სიონი
XXVI ტური 02.05.2015 17:00
დინამო (თბ) 3:2 ტორპედო
1:1 ლაშა თოთაძე 40', 2:1 გიორგი პაპუნაშვილი 51', 3:2 ჯაბა ჯიღაური 86' 0:1 გურამ ადამაძე 10', 2:2 ვახტანგ კვარაცხელია 76'
მატჩის შესახებ
„ქართულ კლასიკოს“ საკმაოდ მრავალრიცხოვანი ქუთაისელი გულშემატკივარი დაესწრო. „დინამო არენაზე“, რომელზეც უეფას სუპერთასისთვის რეკონსტრუქცია მიმდინარეობდა, დღეს უამრავ ცნობილ სახეს ნახავდით(არამარტო ფეხბურთის სფეროდან). მათ შორის გახლდათ საქართველოს ნაკრების მწვრთნელი კახა ცხადაძეც. რაოდენ გასაკვირიც უნდა იყოს, ტრიბუნებზე შეკრებილთა მეტი ნაწილი ჩვენს გუნდს ქომაგობდა. როგორც უკვე გაცნობეთ, შეხვედრას ტორპედოელთაგან, ნიკა საბანაძის გარდა, კიდევ ერთი ფორვარდი - ოთარ კვერნაძე ავადმყოფობის გამო ტოვებდა. „დინამოს“ კი დისკვალიფიკაციის მიზეზით ოთარ კაკაბაძე ვერ ეხმარებოდა.

მატჩი ქუთაისელებმა ენერგიულად დაიწყეს, რამაც მე-10 წუთზე შედეგიც გამოიღო. მარჯვენა მხრიდან კუთხური კლიმიაშვილმა მოაწოდა, მაღალ ბურთს გურამ ადამაძემ შეაგება თავი და ლამაზი გოლიც გაიტანა - 0:1. ამის შემდეგ მცირე უპირატესობას „დინამო“ დაეუფლა, თუმცა სახიფათო მომენტებში სტუმრები მეტოქეს არ ჩამოუვარდებოდნენ. მე-19 წუთზე, პაპუნაშვილის დარტყმული ბურთი შეყრილაძემ იოლად აიღო. 24-ე წუთზე, ჭანტურიშვილმა ააცილა მიზანს. აქედან სამ წუთში ტუღუშმა მარცხენა ფლანგიდან მოულოდნელად დაარტყა კარის მიმართულებით, მაგრამ ბურთი ზემოდან დაეცა ბადეს. მსაჯის მოქმედების შემდეგ საყურადღებო იყო 31-ე წუთი, როცა კლიმიაშვილის გრძელი გადაცემით მეკარესთან პირისპირ გასულმა კირკიტაძემ გოლი გაიტანა, მაგრამ გვერდითმა მსაჯმა არარსებული თამაშგარე დააფიქსირა და ნაღდი გოლი, რომელიც, შეიძლება, გადამწყვეტიც ყოფილიყო, გააუქმა.მე-40 წუთზე, მასპინძლებმა ანგარიში საჯარიმო დარტყმით გაათანაბრეს, შეყრილაძემ ლაშა თოთაძეს ვერ აუღო - 1:1. 42-ე წუთზე, ტორპედოელმა მეკარემ ცინცაძის დარტყმულზე ბურთი მუშტებით უკუაგდო. 45-ე წუთზე კი კლიმიაშვილის პასით მეკარესთან ერთი-ერთზე ზივზივაძე დარჩა, მაგრამ ბურთი ოპონენტს გაარტყა და დაწინაურების ჩინებული შანსიც გაანიავა. ეს მატჩის ერთ-ერთი საკვანძო მომენტი იყო. პირველი ტაიმიც აქედან წამებში, ფრედ 1:1 დასრულდა.

მეორე ტაიმის დასაწყისი დინამოელთა აქტიურობით წარიმართა და მეორე გოლიც მათ გაიტანეს. მანამდე კი გუნდებმა მომენტები გაცვალეს, პაპუნაშვილმა და კირკიტაძემ დარტყმულები ვერ მოზომეს. 51-ე წუთზე კი პირველმა მათგანმა, მას შემდეგ, რაც ხელსაყრელ პოზიციაზე დარჩენილმა მეკარეს გვერდი აუარა, ამჯერად ზუსტად დაარტყა - 2:1. მასპინძლები ბურთს ისევ ფლობდნენ და რამდენიმეწუთიან მონაკვეთში „ტორპედოს“ თამაშის დალაგება უჭირდა. აქედან გამომდინარე, მეტოქემ კვლავ განახორციელა შეტევის ბოლო დარტყმები, თუმცა უხეიროდ. 65-ე წუთზე, ქიმაძემ, ვინც ადამაძესთან ერთად დღეს საუკეთესო იყო „ტორპედოდან“, იყოჩაღა და საჯარიმოში შეჭრილმა ექსტორპედოელი ტაბატაძის მოტყუება სცადა, რა დროსაც ამ უკანასკნელმა ბურთი ხელით გააჩერა, მაგრამ არბიტრმა არაობიექტური გადაწყვეტილება მიიღო და აშკარა პენალტი არ დანიშნა, რამაც ტორპედოელთა პასუხგაუცემელი აღშფოთება გამოიწვია... სამწუხაროდ, მთელი მატჩის განმავლობაში ლევან კვარაცხელიამ დღეს არაერთი უხეში შეცდომა დაუშვა. „ქართული კლასიკოსთვის“ დამახასიათებელი, დაძაბული სცენარი დარჩენილ დროშიც გაგრძელდა. „ტორპედოს“ გააქტიურება ტაბლოზეც აისახა, 76-ე წუთზე ქიმაძის მიერ მარცხენა მხრიდან გაკეთებული გადაცემით ბურთი შეცვლაზე შესულმა ვახტანგ კვარაცხელიამ კოხტა თავური დარტყმით გადაამისამართა მეტოქის კარში - 2:2. 83-ე წუთზე, კირკიტაძემ აართვა ერთ-ერთი დინამოელს მისსავე საჯარიმოს მისადგომებთან ბურთი, დაარტყა კიდეც და... „დინამო“ სანტიმეტრებით გადაურჩა გოლს. საპირისპირო კართან ერთ წუთში ჭანტურიშვილმა დაარტყა არანაკლებ სახიფათოდ და კარს მიღმა გაუშვა ბურთი. თბილისელებმა მესამე გოლი 86-ე წუთზე გაიტანეს, რაც ახლოდან ახლოდან ერთშეხებაში დარტყმით ჯაბა ჯიღაურმა მიითვალა - 3:2. გიორგი დარასელიას შეგირდებმა გაიბრძოლეს და თამაშის დამატებულ წუთებზე ერთი შანსიც „გამოჩხრიკეს“, კვარაცხელიას თავური პასის შემდეგ ზივზივაძემ ვერ დაარტყა ახლო მანძილიდან და მალევე საფინალო სასტვენის ხმაც გაისმა. საბოლოოდ, 3:2 „დინამოს“ სასარგებლოდ.
XXVI ტური 02.05.2015 17:00 დინამო (თბ) 3:2 ტორპედო
XXV ტური 24.04.2015 17:00
ტორპედო 1:2 ჩიხურა
1:1 გურამ ადამაძე 66' 0:1 დავით ოდიკაძე 51', 1:2 მიშიკო სარდალიშვილი 90+3'
მატჩის შესახებ
იმერული დერბის პირველი ტაიმი მაინცდამაინც საინტერესო არ გამოდგა. გუნდები თითქმის ტოლ-სწორად თამაშობდნენ და უფრო მეტ ყურადღებას საკუთარი კარის „მშრალად“ შენახვას უთმობდნენ. მცდელობების მიუხედავად, სახიფათო მომენტამდე საქმე სულ რამდენიმეჯერ მივიდა. ფეხბურთელთა დაზიანების გამო, იყო დროებითი პაუზები, რაც თამაშის ტემპს ანელებდა. ორ ეპიზოდში შეუცდომლად გაისარჯა ქუთაისელთა 23 წლის უკრაინელი მეკარე ალექსეი შევჩენკო, რომელიც უმაღლეს ლიგაში „ტორპედოს“ კარს დღეს პირველად იცავდა. მან ღონღაძისა და დეკანოიძის დარტყმები გააუვნებელყო. ტაიმის მიწურულს მასპინძლები ანგარიშის გახსნასთან ძალზე ახლოს იყვნენ, მაგრამ კირკიტაძის ჩაწოდებისა და ჭელიძის თავურის შემდეგ ბურთმა ხარიხას სანტიმეტრებით ჩაუარა და გუნდებიც გასახდელში საყაიმო ანგარიშით გავიდნენ - 0:0.

მოლოდინისამებრ, მეორე ტაიმში „ტორპედო“ გააქტიურდა. ამის დასტური იყო თამაშის განახლებიდან ორ წუთში შექმნილი ხიფათი, კანკია-კირკიტაძის კომბინაციით ხელსაყრელი ადგილიდან ტუღუშმა ააცილა მიზანს. 51-ე წუთზე, „ჩიხურას“ კონტრშეტევა შედეგიანად დასრულდა, მარცხენა ფლანგიდან ჩიკვაიძის დაბალ გადაცემას დავით ოდიკაძე გამოეხმაურა და დაუცველ კარში ზუსტად დაარტყა - 0:1. რა გასაკვირია, რომ ამის შემდეგ სტუმრები ანგარიშის შენარჩუნებაზე თამაშობდნენ, თუმცა ეს მათ მხოლოდ რამდენიმე წუთით შეძლეს. 64-ე წუთზე, ადამაძის იდეალური გრძელი გადაცემით ბურთი ჭელიძემ ერთი შეხებით დაარტყა კარში, იგი მეკარემ დაიმორჩილა. ზუსტად ერთ წუთში ისევ ჭელიძემ შეასრულა შეტევის ბოლო დარტყმა, მაგრამ მას მიზანმა უმტყუნა. ქუთაისელთა მორიგ შეტევას კი საჩხერელებმა ვეღარ გაუძლეს, კანკიამ მეტოქის საჯარიმოში მაღალი გადაცემა გააკეთა, გამოსვლაზე ზარქუა შეცდა, რითაც კვარაცხელიამ ისარგებლა, ჰაერიდან ბურთი ჩამოიღო და დარტყმა იქვე მყოფ გურამ ადამაძეს დაუთმო, კაპიტანმაც გატანის ბრწყინვალე შანსი უნაკლოდ გამოიყენა - 1:1. „ტორპედო“ მწვავე შეტევებს აგრძელებდა. საჯარიმოს გარედან ორჯერ ტუღუშმა დაარტყა არაზუსტად. ამდენჯერვე „ჩიხურამ“ - ღონღაძის დარტყმულზე შევჩენკო დაეუფლა ბურთს, კაკაშვილმა კი მცირე მანძილით ააცილა კარს. 81-ე წუთზე, ბაბუნაშვილის წაქცევისთვის „ტორპედომ“ 16-17 მეტრიდან სახიფათო საჯარიმო დარტყმის უფლება მოიპოვა. „სტანდარტი“ კირკიტაძემ შეასრულა, რომელსაც სულ ცოტათი ზედმეტად მაღალი დარტყმა მოუვიდა. ტორპედოელებს 86-ე წუთზე მართებდათ დაწინაურება, უფრო სწორად კი კვერნაძეს, რომელმაც ქიმაძის(გიორგი დღეს შეუდარებელი იყო) ჩაწოდებული ბურთი ახლო მანძილიდან ვერ გადაგზავნა კარში. ეს ყველაფერი არ იყო, მატჩს ძალზე დრამატული დასასრული ჰქონდა. თამაშის ბოლო კომპენსირებულ წუთზე „ჩიხურას“ კონტრიერიშის შემდეგ მიშიკო სარდალიშვილმა დაარტყა საგოლედ და საბოლოო ანგარიშიც დააფიქსირა. გასათანაბრებლად „ტორპედოს“, ფაქტობრივად, დრო აღარ დარჩა და ასე მოულოდნელად 7-მატჩიანი(პლუს ერთიც თასზე) წაუგებელი სერიაც შეწყდა - 1:2. მარცხის მიუხედავად, სტადიონზე შეკრებილმა გულშემატკივრებმა ჩვენი გუნდი ტაშით გაამხნევეს...
XXV ტური 24.04.2015 17:00 ტორპედო 1:2 ჩიხურა
XXIV ტური 19.04.2015 16:00
გურია 1:3 ტორპედო
1:1 ვილი ისიანი 73' 0:1 დავით კირკიტაძე 1', 1:2 გიორგი ქიმაძე 87', 1:3 ვახტანგ კვარაცხელია 89'
მატჩის შესახებ
ლანჩხუთში მატჩზე დასასწრებად ქუთაისიდან 100-მდე გულშემატკივარი ჩავიდა, რომლებიც თავიანთ საყვარელ გუნდს აქტიურად უჭერდნენ მხარს. „ტორპედოს“ შემადგენლობასა და ქართულ ჩემპიონატში დებიუტი ჰქონდა რუსული „ხიმკიდან“ გადმოსულ 23 წლის ინალ პუხაევს, რომელმაც დღეს პირველი ტაიმი დაჰყო მოედანზე. შუა ნახევარმცველთან შრომითი ხელშეკრულება რამდენიმე დღის წინ გაფორმდა. „ტორპედომ“ შეხვედრა შთამბეჭდავად დაიწყო, მოედნის ცენტრიდან თამაშში შეტანილი ბურთი ჭელიძემ გრძელი გადაცემით დავით კირკიტაძეს გადააწოდა, რომელსაც სრული 8 წამიც(!) კი არ დასჭირდა მეტოქის კარის დასალაშქრად. ეს საქართველოს ეროვნულ ჩემპიონატში ერთ-ერთი ყველაზე სწრაფი(თუ უსწრაფესი არა) გოლი იყო - 0:1. მასპინძლებს გონზე მოსვლა გაუჭირდათ. მათ შეტევებს ტორპედოელები იოლად უმკლავდებოდნენ და რეალურ საგოლე მომენტამდეც საქმე არ მისულა. „გურია“ ბურთს „ტორპედოზე“ უფრო მეტად კი აკონტროლებდა, მაგრამ ორთაბრძოლების დროს უმეტესად გამარჯვებული ქუთაისელები გამოდიოდნენ. შედარებით სახიფათო იყო ბენაშვილისა და შალამბერიძის დარტყმები. პირველმა მათგანმა მახვილი კუთხიდან ბურთი გარედან მოარტყა ბადეს, მეორე კი შორი მანძილიდან დაემუქრა სტუმართა კარს, მაგრამ შეყრილაძემ დამაჯერებლად ითამაშა. გატანის შანსი ჰქონდა „ტორპედოსაც“, კერძოდ კი, პუხაევს, რომელმაც „საჯარიმოდან“ ძლიერად გაუშვა ბურთი და კარს ოდნავ ააცილა. პირველი ტაიმიც ქუთაისელთა ერთბურთიანი უპირატესობით დასრულდა - 0:1.

მეორე ტაიმის საწყისი წუთები ორმხრივ იერიშებში მიმდინარეობდა. მასპინძლები კვლავ უხეიროდ ურტყამდნენ, სტუმრები კი ორგანიზებულად თამაშობდნენ. 53-ე წუთზე, ამ უკანასკნელთა მიერ წამოწყებული იერიშით ბურთი კლიმიაშვილი-კირკიტაძის გავლით დასარტყმელ პოზიციაზე მყოფ ტუღუშთან მივიდა, რომელმაც ცრუ მოძრაობა სცადა, მაგრამ მცველმა ივარგა და სიტუაცია განმუხტა. 57-ე წუთზე, კლიმიაშვილმა კუთხურის შემდეგ კარში თავით დაარტყა, თუმცა ამ ეპიზოდში მეკარე არ შემცდარა. 62-ე წუთზე, მამასახლისმა დაარტყა საჯარიმოს გარედან, ბურთი კარს გადასცდა. 67-ე წუთზე, ჭელიძის სახიფათო დარტყმულს მცველი გადაეფარა. ანგარიში 73-ე წუთზე გათანაბრდა, შეცვლაზე შესულმა ვილი ისიანმა საჯარიმოს მისადგომებიდან ზუსტად დაარტყა - 1:1. ამ გოლმა თამაშის ტემპი და სანახაობრივი მხარე აშკარად გაზარდა. ორივე გუნდი მოსაგებად იყო შემართული, თუმცა ძალების მობილიზება უფრო მეტად „ტორპედომ“ შეძლო... 77-ე წუთზე, შალამბერიძემ სანტიმეტრებით ააცილა ბურთი მიზანს, რაც მე-80 წუთზე, კირკიტაძის პასით კვარაცხელიამაც გააკეთა, ოღონდ საპირისპირო კართან. 84-ე წუთზე, კირკიტაძემ, რომელმაც დღეს ჩინებულად ითამაშა, დაახლოებით 30 მეტრიდან კარისკენ დაარტყა, ბურთი ხარიხას მოხვდა და კარს უკან წავიდა. „გურიას“ პასუხმა არ დააყოვნა და ამჯერად უკვე ბენაშვილმა მოარტყა ბურთი სტუმართა კარის ზედა ძელს. დაძაბული იყო მატჩის დარჩენილი წუთები, რომლებიც ქუთაისელთა დომინირებით წარიმართა. 87-ე წუთი იყო და ბაბუნაშვილი მისივე გუნდის ნახევრიდან დაიძრა წინ, მან ჭელიძესთან კედელი გაითამაშა, რითაც მარტოდმარტო დარჩა მეკარესთან, მაგრამ არ იხარბა და გონივრული პასით გიორგი ქიმაძე შეატოვა ცარიელ კარს, რომელმაც „ტორპედოში“ მისი პირველი, თანაც ძალზედ მნიშვნელოვანი გოლი გაიტანა - 1:2. აქედან ორ წუთში სათადარიგო სკამიდან თამაშში ჩართულმა ბაბუნაშვილმა მეორე საგოლე პასიც მიითვალა, ამჯერად მან ვახტანგ კვარაცხელია მოძებნა, „კვარამ“ კარგად შეიგდო ბურთი მეტოქის კარისკენ და მეკარე გოგუაძესაც შანსი არ დაუტოვა - 1:3. ეს უკვე გამარჯვება იყო. ბრწყინვალე გამარჯვება, რომლითაც საშინაო კედლებში „გურიას“ 11-მატჩიანი წაუგებელი სერია შეწყდა და „ტორპედო“ სატურნირო ცხრილში მე-8 ადგილზე გადავიდა.
XXIV ტური 19.04.2015 16:00 გურია 1:3 ტორპედო
XXIII ტური 11.04.2015 16:00
ტორპედო 0:0 ზუგდიდი
მატჩის შესახებ
დღევანდელ შეხვედრაში, რომელიც უმეტესად წვიმის ფონზე მიმდინარეობდა, „ტორპედოს“ სასტარტო შემადგენლობაში პირველად მოხვდა 18 წლის ზაურ გოგუაძე, რომელმაც დისკვალიფიცირებული ირაკლი კლიმიაშვილის ადგილი დაიკავა. გარდა ამ უკანასკნელისა, ქუთაისელებს კიდევ ერთი ფეხბურთელი აკლდათ - ტრავმირებული ნიკა საბანაძე.

თამაშის საწყისი 20 წუთი მშვიდ ვითარებაში მიილია და სამახსოვროც არაფერი ყოფილა. აღნიშნული დროის ამოწურვიდან წამებში გოგუაძემ „სტანდარტი“ კარისკენ ჩააწოდა, სადაც მაღალ ბურთზე ჭელიძემ ითამაშა, რომლისგანაც ბურთი ადამაძეს მიუვიდა, მისი თავური არაზუსტი გამოდგა. 23-ე წუთზე, მარჯვენა ფლანგიდან განვითარებული იერიშით საჯარიმოში შესული კვერნაძე რამდენიმე ზუგდიდელს შორის გაძვრა, თუმცა მას სასურველი მიმართულებით დარტყმა არ გამოუვიდა. ზუგდიდელებმა 30-ე წუთზე გვიპასუხეს, სწრაფი კონტრშეტევის შემდეგ კუტალიამ დაარტყა დაბალი ტრაექტორიით კარში, ბურთს შეყრილაძე ადგილზე დახვდა. 32-ე წუთზე, კირკიტაძის მიერ კუთხურიდან მოწოდებულ ბურთს ადამაძე გამოეხმაურა, კაპიტანმა ვერც ამჯერად მოახვედრა მიზანში. მასპინძლები გამოკვეთილ უპირატესობას დაეუფლნენ და ერთი-მეორის მიყოლებით ქმნიდნენ საგოლე მომენტებს. 37-ე წუთზე, მარჯვნიდან გოგუაძემ ჩააწოდა მეტოქის კარის საპენალოსთან, სადაც ბურთი ტუღუშმა მიიღო, დაამუშავა და მეურვისგან ხელის შეშლის მიუხედავად, ეფექტურადაც დაარტყა, თუმცა ბურთი ოდნავ შეეხო ერთ-ერთ ზუგდიდელს და კარს სანტიმეტრებით ასცდა. ამას კუთხური და ისევ ადამაძის არაზუსტი თავური მოჰყვა, რომელსაც ბურთის მიღების ვარიანტიც ჰქონდა, მაგრამ მან კვლავ თავით იმოქმედა და ხელსაყრელი შანსი ვერ გამოიყენა. ამით ადამაძის უიღბლო დარტყმები არ დამთავრებულა, მე-40 წუთზე ქუთაისელმა მცველმა კირკიტაძის შესრულებულ კუთხურზეც ვერ გამოიჩინა თავი. ასეთ წნეხში მყოფ "ზუგდიდს" 15-წუთიანმა შესვენებამ „სულზე მოუსწრო“.

მეორე ტაიმი ერთი წუთის დაწყებული იყო, როცა კვერნაძემ, რომელსაც შედევრამდე სულ ცოტა დააკლდა, ინდივიდუალური ოსტატობის ხარჯზე ორ ოპონენტს ჩინებულად აუარა გვერდი, მეკარესთან პირისპირ გავიდა, კარშიც დაარტყა, თუმცა ბობღიაშვილმა სწრაფი რეაქცია გამოავლინა და ბურთი კუთხურზე მოიგერია. 65-ე წუთზე ზუგდიდელთა მეკარემ კვერნაძის მიერ დარტყმული მორიგი ბურთიც იგივე გზაზე გაუშვა. შეტევის ბოლო დარტყმები კონტრშეტევებზე მოთამაშე ზუგდიდელებმაც განახორციელეს, მათგან უფრო სახიფათო იყო გუგუჩიას ეპიზოდი, რომელმაც მიზანს ოდნავ ააცილა. ქუთაისელები აქტიურობდნენ, რის შედეგადაც 73-ე წუთზე ასპროცენტიანი საგოლე მომენტი შეიქმნა, მარცხენა ფლანგიდან ჩაწოდებული ბურთი ჭელიძეს მიუვიდა, რომლის ახლო მანძილიდან დარტყმით სტუმრები კიდევ ერთხელ აშკარად გადაურჩნენ გაშვებულ გოლს. იმის დასტურად, რომ გუნდები იბრძოდნენ, ხშირი იყო ჯარიმები, თუმცა ისიც უნდა ითქვას, რომ სირიელი არბიტრი ზოგჯერ აშკარად ცდებოდა. 81-ე წუთზე, კირკიტაძის ჩაწოდებით რიგვავამ კინაღამ საკუთარ კარში ჩაჭრა ბურთი. „ტორპედოს“ მორიგი კუთხურის შემდეგ მეტოქის კართან არეულობა შეიქმნა, მასპინძლებმა ვერ იხეირეს და საბოლოოდ ბურთი ბობღიაშვილმა დაიჭირა. დარჩენილ დროში ქუთაისელებმა შტურმის მოწყობა სცადეს, რაც ნაწილობრივ გამოუვიდათ კიდეც, თუმცა მათი შეტევა მაქსიმუმ კუთხურით სრულდებოდა, რომელიც გიორგი დარასელიას შეგირდებმა დღევანდელ მატჩში სულ 15-ჯერ მოაწოდეს. თვალშისაცემი იყო სტუმარ ფეხბურთელთა სტრატეგია, რაც მთელი მეორე ტაიმის განმავლობაში დროის გაყვანაში მდგომარეობდა. ბასლეჰლომ საფინალო სასტვენამდე მეორე ყვითელი ბარათი ტორპედოელ გივი იოსელიანს უჩვენა და მოედანი დროზე 2 წუთით ადრე დაატოვებინა. ამგვარად, გუნდებმა ქულები გაიყვეს, რაც თამაშის სცენარის მიხედვით ალოგიკური კი იყო, თუმცა ეს ფეხბურთია... ამით გუნდების პირველი წრის ურთიერთშეხვედრაში დაფიქსირებული შედეგი განმეორდა - ამჯერადაც ფრე 0:0.
XXIII ტური 11.04.2015 16:00 ტორპედო 0:0 ზუგდიდი
XXII ტური 03.04.2015 16:00
დინამო (ბთ) 2:3 ტორპედო
1:0 დიმიტრი ტატანაშვილი 8', 2:3 თეიმურაზ შონია 90' 1:1 გურამ ადამაძე 68', 1:2 დავით კირკიტაძე 75', 1:3 ოთარ კვერნაძე 82'
მატჩის შესახებ
თამაშის აღწერამდე მოკლედ გუნდების ურთიერთსტატისტიკაზე მოგახსენებთ - ეროვნული ჩემპიონატების ჩატარების დღიდან, ქუთაისის “ტორპედო” და ბათუმის “დინამო” (საწყის 3 ჩემპიონატში ჩვენი გუნდი “ქუთაისის” სახელით გამოდიოდა, აჭარლებმა კი უფრო დიდხანს (5 სეზონი) უერთგულეს მშობლიური ქალაქის სახელს) უმაღლეს ლიგაში 44-ჯერ, ხოლო თასის გათამაშებაში 8-ჯერ არიან შენახვედრი. ამ მატჩების საერთო ბალანსი ასეთია: “ტორპედომ” 27-ჯერ მოიგო, “დინამომ” 14-ჯერ, ფრედ კი 11 დამთავრდა. ბურთების შეფარდებაც ჩვენი გუნდის უპირატესობას ადასტურებს - 80:56.

გუნდების 45-ე დაპირისპირებამ დიდი ინტერესი გამოიწვია. ერთი მხრივ, ადგილობრივ გულშემატკივარს სურდა „დინამოს“ 6-მატჩიანი მოგებათა სერიის გაზრდა, მეორე მხრივ კი ქობულეთში ჩასულ 100-მდე ქუთაისელ ქომაგს სჯეროდა თავიანთი საყვარელი გუნდის ზედიზედ მეოთხედ გამარჯვების. მატჩი სწრაფი გოლით დაიწყო, მე-8 წუთზე მარცხენა ფლანგიდან ჩაწოდებული ბურთი დინამოელმა დიმიტრი ტატანაშვილმა გადაგზავნა თავით კარში - 1:0. თამაშის ტემპი სწრაფი კი იყო, თუმცა პირველ ტაიმში საგოლე მომენტების ნაკლებობა შეინიშნებოდა. გარდა გოლისა, სულ 1-2 სახიფათო დარტყმა იყო სამახსოვრო, რომლებიც ბათუმელებმა შეასრულეს. ტორპედოელები მეტოქეს თითქმის არც ერთ სათამაშო კომპონენტში არ ჩამოუვარდებოდნენ, მაგრამ ჩვენი გუნდის იერიშები ხან ზუსტი დარტყმით არ ბოლოვდებოდა, ხანაც მეკარე ალავიძე თამაშობდა საიმედოდ.

მეორე ტაიმის დაწყებისთანავე გიორგი დარასელიამ დუბლებიდან ახლადდაწინაურებული გოგუაძე შეუშვა მინდორზე, მოგვიანებით კი - ბაბუნაშვილი. გამათანაბრებელი გოლი სწორედ ამ უკანასკნელის გამოსვლიდან რამდენიმე წამში გავიდა. 68-ე წუთი მიმდინარეობდა, როცა ჭელიძის პასით კირკიტაძე აღმოჩნდა დასარტყმელ პოზიციაზე, დათოს გასროლით ალავიძემ ბურთი კუთხურზე მოიგერია. „სტანდარტის“ ჩაწოდების შემდეგ მეტოქის საჯარიმოში ფეხით ჭელიძემ დაარტყა, რომელსაც მეკარემ მოუგერია, თუმცა ბურთი მარცხენა ძელთან მყოფ გურამ ადამაძეს მიუვიდა, კაპიტანმაც თავით საკადრისად იმოქმედა და ბურთი ბადეში გაახვია. სხვათა შორის, ადამაძე დღეს ერთ-ერთი საუკეთესო იყო ორივე გუნდიდან. დარჩენილი დრო „ტორპედოს“ სრული სათამაშო უპირატესობით წარიმართა. ქუთაისელები მასპინძლებს სივრცეებს უზღუდავდნენ და ამოსუნთქვის საშუალებასაც არ აძლევდნენ, რამაც შედეგი 75-ე წუთზე გამოიღო - ჭელიძემ მარჯვნივ დავით კირკიტაძე მოძებნა, რომელმაც მეკარისგან მარჯვენა დაბალ კუთხეში მოათავსა ბურთი და სტუმრები დააწინაურა - 1:2. ტორპედოელთა დომინირება კვლავ გაგრძელდა და მათივე აქტიურობით ანგარიშის სხვაობა 82-ე წუთზე გაიზარდა, გოგუაძის ძლიერი დარტყმით მეკარემ გადაარჩინა „დინამო“, თუმცა დამატებაზე ოთარ კვერნაძის დარტყმულს კი ვეღარაფერი მოუხერხა და ქუთაისელმა ფორვარდმა მისი მე-9 გოლი გაიტანა მიმდინარე ჩემპიონატში - 1:3. თამაში მშვიდად მიდიოდა ლოგიკურ დასასრულამდე, თუმცა ბათუმელებმა ერთი გოლის გაქვითვა შეძლეს, 90-ე წუთზე მასპინძელთა იშვიათთაგანი შეტევით თეიმურაზშონიამ დაარტყა ზუსტად - 2:3, თუმცა ამან „ტორპედოს“ დასახული მიზნის მიღწევაში პრობლემა ვერ შეუქმნა და საფინალო სასტვენის შემდეგ აწ უკვე ყოფილი ლიდერის დამარცხებით ქუთათურებმა ზედიზედ მეოთხე სამი ქულა მიითვალეს(3:2).
XXII ტური 03.04.2015 16:00 დინამო (ბთ) 2:3 ტორპედო
XXI ტური 22.03.2015 17:00
ტორპედო 3:1 სამტრედია
1:0 ოთარ კვერნაძე 40', 2:1 ირაკლი კლიმიაშვილი 59', 3:1 ბექა ტუღუში 76' 1:1 გიორგი ქიმაძე (ავტ.) 57'
მატჩის შესახებ
იმერულ დერბის წვიმიანი ამინდი დაემთხვა, თუმცა გუნდებისთვის ამას მნიშვნელოვანი დისკომფორტი არ შეუქმნია. მატჩის პირველი ტაიმი გარდამავალი უპირატესობით მიმდინარეობდა. „პროლოგში“ შეყრილაძემ გეწაძისა და დათუნაიშვილის დარტყმებზე ითამაშა დამაჯერებლად. „ტორპედომ“ ტუღუშის გასროლით უპასუხა, რომელმაც მოედნის ცენტრში ორი ოპონენტი ჩამოიცილა და ცოტათი ააცილა მიზანს. 38-ე წუთზე, ტორპედოელმა პირველმა ნომერმა თევზაძის სახიფათო დარტყმით მიწიდან ასხლეტილი ბურთი „გააქვავა“. თამაში მშვიდ რიტმში გრძელდებოდა, სანამ მასპინძლები გახსნიდნენ ანგარიშს: მე-40 წუთზე, კირკიტაძემ, რომელმაც ამ გოლში ლომის წვლილი შეიტანა, მარჯვენა ფლანგზე კაკუბავას მოპარა ბურთი და დრიბლინგის შემდეგ უზუსტესი პასი გაუკეთა ოთარ კვერნაძეს, ამ უკანასკნელმაც გატანის შანსი ხელიდან არ გაუშვა - 1:0. ტაიმის დასრულებამდე ჭელიძეს შეეძლო სხვაობის გაზრდა, მაგრამ ზაზამ კუთხურიდან ჩაწოდებული ბურთი კარში ვერ გადაგზავნა.

დასკვნითი ტაიმი სტუმართა აქტიურობით დაიწყო. ბეჭვაიასა და გეწაძის არაზუსტ დარტყმებს მალევე ანგარიშის გათანაბრება მოჰყვა - 57-ე წუთზე, გეწაძის ჩაწოდებული ბურთი საკუთარ კარში გიორგი ქიმაძემ ჩაჭრა. ამ ეპიზოდში 22 წლის მცველი ერთადერთხელ შეცდა დღევანდელ შეხვედრაში. დავამატებდით, რომ მის გარდა, მცველთა ტრიო, იოსელიანი- მირცხულავა-ადამაძეც მოწოდების სიმაღლეზე იყო. გაშვებულმა გოლმა მასპინძლები არ დააბნია და მათ ორი წუთის წინანდელი სტატუს-კვო 59-ე წუთზე აღადგინეს. მარცხენა მხრიდან დანიშნულ „სტანდარტი“ ირაკლი კლიმიაშვილმა შეასრულა, რომლისგან გაგზავნილი ბურთი ისე გაეხვა თევდორაძის კარის ბადეში, რომ ჰაერში არც ერთ ფეხბურთელს არ შეხებია, კლიმიაშვილისთვის ეს ზედიზედ მეორე მატჩში გატანილი გოლია - 2:1. თამაშის ბოლო მესამედში უპირატესობას გიორგი დარასელიას შეგირდები დაეუფლნენ, რომლებმაც 76-ე წუთზე სამტრედიელთა კარი კიდევ ერთხელ, ასე დალაშქრეს: მამასახლისმა გონივრული პასი გაუკეთა შეცვლაზე შესულ კვარაცხელიას, რომელმაც მეკარეზე გვერდის ავლით ბექა ტუღუშს დაუგორა მახვილი კუთხიდან, 88-ე ნომერმა „მარცხენათი“ ეფექტური გოლი გაიტანა, ბურთი ძელიდან შევარდა კარში - 3:1. დარჩენილ დროში ანგარიშის სათავისოდ შეცვლის უფრო მეტი შანსი ჩვენს გუნდს ჰქონდა. სტუმართაგან გამორჩეულად სახიფათო იყო კაპანაძის დარტყმა, რომელმაც ძელს მოახვედრა ბურთი, გამოვარდნილზე კი საქართველოს ნაკრების ყოფილ ფეხბურთელ იაშვილს მირცხულავა ჩაუხტა ფეხებში და განმუხტა სიტუაცია. არბიტრის ბოლო სასტვენის ხმაზე „ტორპედომ“ სამი გოლით ზედიზედ მესამე სამი ქულა გაიფორმა და ლამაზი თამაშით საკუთარი გულშემატკივრები ნასიამოვნები დატოვა. ამასთან, „სამტრედიასთან“ სათასო დუელში დამარცხების გამო დამსახურებული რევანში აიღო და სატურნირო ცხრილში მე-9 ადგილზე აინაცვლა.
XXI ტური 22.03.2015 17:00 ტორპედო 3:1 სამტრედია
XX ტური 18.03.2015 17:00
ტორპედო 2:0 ცხინვალი
1:0 ირაკლი კლიმიაშვილი 28', 2:0 ბექა ტუღუში(პენ) 33'
მატჩის შესახებ
მატჩის საწყისი წუთები საშუალო ტემპში წარიმართა. პირველი კარში დარტყმები სტუმრებმა განახორციელეს, მახარობლიძის მიერ მიწაზე გაგორებული ბურთი შეყრილაძემ დაიმორჩილა. აქედან ორ წუთში კი, მან კაჭარავას მოუგერია ფეხით. მე-17 წუთზე, კლიმიაშვილმა საჯარიმო დარტყმით დაახლოებით 30 მეტრიდან კარში გაუშვა ბურთი, რომელიც ხარიხას მოხვდა და მოედნის ფარგლებს გარეთ გადავიდა. მატჩის ეპიცენტრი 28-ე წუთზე დაფიქსირდა, როცა „ცენტრალურზე“ შეკრებილი გულშემატკივრები ირაკლი კლიმიაშვილმა მოიყვანა აღტაცებაში, მან კუთხური აქცია ულამაზეს გოლად - 1:0. არ გასულა 2 წუთი და ანგარიშის გამხსნელმა ქუსლით გადააწოდა ბურთი ქიმაძეს, რომელიც მეტოქის საჯარიმოში შეიჭრა, სადაც მას კაჭკაჭიშვილმა სარმა გამოსდო, რასაც პენალტი და ბექა ტუღუშის გოლი მოჰყვა, ტორპედოელის დარტყმით მეკარე და ბურთი სხვადასხვა კუთხეში აღმოჩნდნენ - 2:0. 42-ე წუთზე, კუთხურის შემდეგ შინდაგორიძემ დაუხვედრა ბურთს თავი, შეყრილაძემ იოლად განმუხტა სიტუაცია. „ტორპედოს“ პირველ ნომერს 44-ე წუთზე მცირე რიკოშეტის შედეგადაც არ გასჭირვებია ბურთი აღება. მასპინძლებმა საპასუხო იერიში წამოიწყეს, მარჯვენა ფლანგიდან კირკიტაძემ საბანაძე მოძებნა, მცველებთან ჭიდილში ადრესატმა ბურთი მიიღო, დაარტყა, მაგრამ მას ნადირაძე დაუეფლა. შესვენებაზე ქუთაისელები ორბურთიანი უპირატესობით გავიდნენ.

მეორე ტაიმში „ტორპედო“ ბურთით დომინირებდა, „ცხინვალი“ კი კონტრშეტევებით ცდილობდა თამაშის გადარჩენას, თუმცა კახა კაჭარავას გაწვრთნილი გუნდის შანსები 63-ე წუთზე კიდევ უფრო შემცირდა - ამ უკანასკნელის ვაჟმა, ნიკა კაჭარავამ მსაჯის სიტყვიერი შეურაცხყოფის გამო წითელი ბარათი მიიღო და მოედანი დროზე ადრე დატოვა. კაცნაკლულმა „ცხინვალმა“ ჩვენი გუნდის კარს კი შეუტია, თუმცა შეყრილაძემ დღესაც წარმატებით იასპარეზა და ზედიზედ მე-3 „მშრალი“ მატჩი ჩაატარა. 85-ე წუთზე, გიორგი დარასელიას შეგირდებმა კიდევ ერთი პენალტი მოიპოვეს, კერძოდ, ჭელიძის ჩაწოდებით ბურთი ბაჩიაშვილს მოხვდა ხელზე. „11-მეტრიანი“ შეცვლაზე შესულმა ზივზივაძემ არაზუსტად შეასრულა. დარჩენილ დროში საინტერესო იყო „ტორპედოს“ დუბლშემადგენლობიდან დაწინაურებული 18 წლის ნახევარმცველის, ზაურ გოგუაძის მოედანზე ხილვა, დღეს უმაღლეს ლიგაში მისი დებიუტი შედგა. მატჩის კომპენსირებულ დროში ბაბუნაშვილმა ვერ მოზომა დარტყმული. რაც შეეხება ბოლო სახიფათო მომენტს, ჭელიძის პასით საჯარიმოს შიგნიდან კირკიტაძემ გაისროლა, მაგრამ ბურთი მეკარემ მოიგერია კუთხურზე. ასე რომ, „ტორპედომ“ მატჩი მშვიდად მიიყვანა დამაჯერებელ გამარჯვებამდე(2:0) და 6-თვიანი პაუზის შემდეგ საშინაო სამი ქულა მოიპოვა, რითაც სატურნირო ცხრილში მე-10 ადგილზე გადაინაცვლა.
XX ტური 18.03.2015 17:00 ტორპედო 2:0 ცხინვალი
XIX ტური 14.03.2015 15:00
ვიტ ჯორჯია 0:1 ტორპედო
0:1 შოთა ბაბუნაშვილი 74'
მატჩის შესახებ
ურთიერთშეხვედრების ისტორიაში გუნდებს შორის უმაღლეს ლიგაში დღემდე 39 მატჩი იყო გამართული. ამ პაექრობებიდან 16 ქუთაისელებმა მოიგეს, 15 ფრედ დასრულდა, 8-ში კი მეტოქემ იმარჯვა(ბურთების შეფარდება - 49:34). მე-40 დაპირისპირებას ქუთაისელთაგან მაღალი ტემპერატურის გამო ფორვარდი ოთარ კვერნაძე აკლდა. „ვიტ ჯორჯიას“ მთავარი მწვრთნელის პოსტზე დებიუტი ჰქონდა თენგიზ კობიაშვილს.

შეხვედრა ექსტრაორდინალურად დაიწყო, რამეთუ მსაჯის პირველი ჩასტვენიდან მე-12 წამზე მასპინძლებმა პენალტის დარტყმის უფლება მოიპოვეს. ნიშნულიდან მაისურაძემ მარცხენა კუთხეში დაარტყა, სადაც შეყრილაძე გადახტა და ბურთიც მოიგერია. ქრონოლოგიას დავარღვევთ და აქვე მოგახსენებთ ტორპედოელი მეკარის ჩინებულ თამაშზე, რომელმაც გარდა ამ ვაჟკაცობისა, საწყის ნახევარ საათში კიდევ ორ ეპიზოდში გამოავლინა ბრწყინვალე რეაქცია და მეტოქეებს ახლო მანძილიდან არ გაატანინა. ასპროცენტიანი მომენტები სტუმრებმაც შექმნეს, ათწუთიან მონაკვეთში ჭელიძე ორჯერ იყო ახლოს საწადელთან, მაგრამ პირველად მან კირკიტაძის პასით ვერ შეძლო მეკარეზე ბურთის აცილება, შემდეგ კი ასევე კირკიტაძის დარტყმულსა და შეროზიას მოგერიებულს დაამატა და სანტიმეტრებით ააცილა ბურთი კარს. ამ უკანასკნელს კიდევ საბანაძისა და კლიმიაშვილის დარტყმებზე მოუწია ბურთის აღება. პირველი ტაიმი არაერთი რეალური საგოლე მომენტის მიუხედავად უგოლოდ დასრულდა - 0:0.

დასკვნითი ტაიმიც არანაკლებ საინტერესო გამოდგა. 57-ე წუთზე, კუთხურის შემდეგ შეყრილაძემ ფეხებით მოიგერია კარში დარტყმული ბურთი. მე-60 წუთზე, საბაძემ ახლოდან დარტყმის შედეგად ანგარიშის გახსნის მშვენიერი შესაძლებლობა ვერ გამოიყენა. დარჩენილი ნახევარი საათი „ტორპედოს“ აშკარა უპირატესობით გაგრძელდა. „ტორპედოში“ შეცვლების დრო რომ დადგა, გიორგი დარასელიამ თამაშში ბაბუნაშვილი და ზივზივაძე ჩართო. მათი მოედანზე გამოჩენის შემდეგ ქუთაისელებმა უფრო მწვავედ დაიწყეს მეტოქის კარზე ზეწოლა, ამან შედეგი 74-ე წუთზე გამოიღო - ერთ-ერთი იერიში მარცხენა ფლანგიდან განვითარდა, ზივზივაძემ დაბალი ტრაექტორიით ჩააწოდა კარის გასწვრივ, იქ ბურთს შოთა ბაბუნაშვილი დახვდა, რომელმაც ერთი შეხებით ზუსტად დააგვირგვინა და 11-წლიანი პაუზის მერე „ტორპედოს“ შემადგენლობაში კვლავ გამოიჩინა გოლით თავი - 0:1. 34 წლის ნახევარმცველს დუბლის გაფორმების შანსიც მიეცა, მაგრამ ხელსაყრელი პოზიციიდან დარტყმა სუსტი გამოუვიდა და ბურთს მეკარე დაეუფლა. მალევე მისი აქტიურობით საბანაძემ დაარტყა არაზუსტად მახვილი კუთხიდან. სამახსოვრო იყო ტუღუშის გასროლაც, რაც შეროზიამ გაანეიტრალა. საბოლოოდ, „ტორპედომ“ მატჩი გამარჯვებამდე კი მიიყვანა, მაგრამ იქამდე კიდევ ერთ „ჩხვლეტას“ გაუძლო, როცა ერთ-ერთი ტორპედოელის შეცდომით დადიანმა მოუხერხებლად დაარტყა კარში. საბოლოო შედეგზე გავლენა არ მოუხდენია დამატებულ წუთებზე არბიტრის სიტყვიერი შეურაცხყოფის გამო ბადრი დემეტრაშვილის გაძევებას. გაგნიძის საფინალო სასტვენის ხმაც გაისმა, რამაც ჩემპიონატში „ტორპედოს“ 12-მატჩიანი მოუგებელი სერიის დასრულება გვამცნო. ამავდროულად, ეს მიმდინარე წელს ჩვენი განახლებული გუნდის პირველი ოფიციალური გამარჯვებაცაა(1:0).
XIX ტური 14.03.2015 15:00 ვიტ ჯორჯია 0:1 ტორპედო
XVIII ტური 05.03.2015 15:00
ტორპედო 1:1 მერანი
1:1 ნიკა საბანაძე 45+1' 0:1 საბა ლომია 32'
მატჩის შესახებ
გაზაფხულის მე-5 დღეს ქუთაისში არასაფეხბურთო ამინდი დაემთხვა. დილიდანვე წვიმდა. გუნდების მატჩისწინა მოთელვის დროს კი, თოვლიც წამოვიდა. საშინელი სუსხისა და სიცივის მიუხედავად, „ცენტრალურის“ ტრიბუნებზე ჩვენი გუნდის რამდენიმე ასეული ქომაგი მაინც შეიკრიბა. „ტორპედოს“ მთავარმა მწვრთნელმა, გიორგი დარასელიამ თავიდანვე შეტევითი ტაქტიკა აირჩია და წინა ხაზში თავდამსხმელთა ტრიო, საბანაძე-კვარაცხელია-კვერნაძე გაამწესა. თუ ერთ ეპიზოდს არ ჩავთლით, როცა ჯღამაიამ არაზუსტად დაარტყა თავით, საწყისი 20 წუთი მხოლოდ ქუთაისელთა მიერ შექმნილი სახიფათო მომენტებით ხასიათდებოდა. კლიმიაშვილმა საჯარიმო დარტყმით ვერ მოახვედრა ბურთი მიზანში, ხოლო კირკიტაძისა და კვარაცხელიას ბოლო დარტყმებს მერანელები გადაეღობნენ. მე-13 წუთზე, დაწინაურების რეალური შანსი ვერ გამოიყენა კვერნაძემ, რომელმაც ჩიკვილაძის ჩაწოდებით სამიოდე მეტრიდან იმ მიმართულებით გაუშვა ბურთი, სადაც მამალაძე იდგა. აქედან ერთ წუთში იყო ჭელიძის გასროლა და მეკარის მიერ ბურთის კუთხურზე მოგერიება. „მერანის“ გამოცოცხლებას მასპინძელთა კარში გატანილი გოლი მოჰყვა, 32-ე წუთზე, ტორპედოელ მცველებს საბა ლომია გაეპარათ, მეკარესთან პირისპირ გასულმა ფორვარდმა მცირე რიკოშეტის შედეგად ანგარიში გახსნა - 0:1. ანგარიშში ჩამორჩენის შემდეგ ტორპედოელებს ოდნავი დაბნეულობა შეეტყოთ, ამით ქიქავასა და წყაროზიას შეეძლოთ ესარგებლათ, თუმცა კარს ააცილეს. საპირისპირო კართან იგივე გააკეთა კვარაცხელიამაც. პირველი ტაიმის დამატებულ წუთზე „ტორპედომ“ საქმე კვლავ ნულიდან დაიწყო, მეტოქის საჯარიმოს მისადგომებთან ორთაბრძოლაში კვარაცხელიამ ივარგა და მარჯვნივ კირკიტაძეს გაუგორა ბურთი, დათომ იდეალური პასით ნიკა საბანაძე მონახა, რომელმაც ზედიზედ მეორე მატჩში გამოიჩინა გოლით თავი - 1:1.

მეორე ტაიმში ქუთაისელებმა სრული სათამაშო უპირატესობა მოიპოვეს. 65-ე წუთამდე მარტვილელები მეტოქის ნახევარზეც კი სულ რამდენიმეჯერ გადავიდნენ. „ტორპედოდან“ დაწინაურების შესაძლებლობა კვარაცხელიას, ქიმაძეს, საბანაძესა და კვერნაძეს ჰქონდათ. მათგან ყველაზე მაღალპროცენტიანი შანსი სწორედ ამ უკანასკნელს მიეცა, მან დრიბლინგის შემდეგ ხელსაყრელი პოზიციიდან დაარტყა მეკარისგან მარცხენა კუთხეში, მაგრამ მამალაძემ კარგი რეაქცია გამოავლინა და ბურთიც მოიგერია. სხვათა შორის, კვერნაძემ ამ მომენტამდე ცოტა ხნით ადრე გოლიც გაიტანა, რომელიც ოფსაიდის გამო არ ჩაითვალა. 66-ე წუთზე, კონტექსტიდან ამოვარდნილს ჰგავდა გეგეჭკორის დარტყმა, ბურთი კარს მიღმა წავიდა. 71-ე წუთზე, კირკიტაძის ჩაწოდებით კვლავ კვერნაძე ცდილობდა თავით გატანას, თუმცა ისევ მეკარემ ივაჟკაცა. ერთ წუთში კლიმიაშვილის შესრულებული „სტანდარტით“ „მერანი“ ადამაძისგან გადაურჩა გოლს, ტორპედოელმა ფეხით ოდნავ არაზუსტად იმოქმედა. 83-ე წუთზე, საბანაძემ „საჯარიმო“ დაარტყა და მცირე მანძილით ააცილა „ჩარჩოს“. შეტევაზე ორიენტირებულ „ტორპედოს“ სტუმართა ერთი-ორი სახიფათო კონტრშეტევის დროს მოუწია ნერვიულობა, მათ შორის 90-ე წუთზე, ციცხვაიას უშედეგო თავური დარტყმით. მეორე ტაიმზე დამატებულ 4 წუთშიც მომენტის რეალიზება არ მოხდა და საბოლოო ანგარიშიც პირველი ტაიმის დაფიქსირდა - 1:1.
XVIII ტური 05.03.2015 15:00 ტორპედო 1:1 მერანი
XVII ტური 01.03.2015 15:00
დილა 2:1 ტორპედო
1:0 ნიკა კვეკვესკირი 14', 2:0 თენგიზ ჩიკვილაძე(ავტ) 41' 2:1 ნიკა საბანაძე 74'
მატჩის შესახებ
მატჩის დაწყებამდე სტადიონზე მყოფმა პუბლიკამ წუთიერი დუმილით ჩვენი გუნდის მთავარი მწვრთნელის, გიორგი დარასელიას მეუღლის, ინგა დარასელიას ხსოვნას მიაგო პატივი. შეხვედრის პირველი სახიფათო მომენტები „ტორპედომ“ შექმნა. „პროლოგში“ ბაბუნაშვილისა და კლიმიაშვილის დარტყმები იყო სამახსოვრო, პირველ მათგანს მიგინეიშვილმა აუღო ბურთი, მეორეს კი, სიზუსტემ უმტყუნა. მე-14 წუთზე, დღევანდელ მატჩში მასპინძლებმა მეტოქის კარის ჩარჩოში პირველად და უკანასკნელად დაარტყეს ბურთი, ზუსტად შესრულებული „ჯარიმით“ ნიკა კვეკვესკირმა გახსნა ანგარიში - 1:0. აქედან ხუთ წუთში ქებაძის პასით საბანაძე შეიჭრა გორელთა საჯარიმოში, მაგრამ ხელსაყრელი ადგილიდან დარტყმა მისთვის სასურველი არ გამოუვიდა. საერთოდ, პირველ ტაიმში იშვიათი იყო მწვავე დარტყმები. ამ კუთხით ქუთაისელებს უკეთესი სტატისტიკა ჰქონდათ, თუმცა მათ 41-ე წუთზე არ გაუმართლათ, როცა სტანდარტული მდგომარეობის შემდეგ ბურთი საკუთარ კარში თენგიზ ჩიკვილაძემ ჩაჭრა - 2:0. ერთი გოლის გაქვითვა ტორპედოელებს მალევე შეეძლოთ, საჯარიმოს გარედან ქიმაძის ეფექტური დარტყმით მიგინეიშვილმა 2:0 ძალაში დატოვა.

მეორე ტაიმი სტუმრებმა ორმაგი ცვლილებით დაიწყეს - მოედანზე კირკიტაძე და კვერნაძე შევიდნენ, ოდნავ მოგვიანებით კი ტუღუშიც, შედეგად, „ტორპედოს“ უპირატესობა გაიზარდა, თუმცა, რასაკვირველია, ქუთაისელთა თამაშში ხარვეზებიც იყო. მეორე ტაიმში „დილამ“ ერთადერთი ღირებული ეპიზოდი 65-ე წუთზე შექმნა, გორელიშვილი თავურით ბურთი კარს ასცდა. დარჩენილი დრო ქუთაისელთა სრული დომინირებით წარიმართა. 67-ე წუთზე, კირკიტაძის სახიფათო დარტყმით ბურთი მიგინეიშვილმა მოიგერია კუთხურზე. 71-ე წუთზე, მეტოქის საჯარიმოს ხაზიდან მეურვეებს შორის მყოფმა საბანაძემ დაარტყა და ბურთი მცირე მანძილით ააცილა მიზანს. „ტორპედოს“ ხანგრძლივმა შტურმა შედეგი 74-ე წუთზე გამოიღო, კირკიტაძე-კვერნაძის გავლით ბურთი ნიკა საბანაძეს მიუვიდა, რომელმაც საპენალტოს ნიშნულიდან გაიტანა - 2:1. შიდაქართლელები ამის შემდეგაც დიდი ძალებით იცავდნენ თავს. დაახლოებით 7-8 წუთმა ისე განვლო, რომ მათ მეტოქისთვის არ შეუტევიათ. 77-ე წუთზე, ტუღუშმა შეასრულა საჯარიმო დარტყმა, ბურთი „ცოცხალ კედელს“ მოხვდა და კუთხურზე გადავიდა. აღსანიშნავია, რომ ამ ეპიზოდში ტორპედოელები პენალტს აპელირებდნენ, მაგრამ არბიტრმა მათ მოთხოვნას ტუღუშის „გაყვითლებით“ უპასუხა. გარდა ამისა, ყრუაშვილი სხვა გადაწყვეტილელებშიც არადამაჯერებელი ჩანდა. 88-ე წუთზე, ჩიკვილაძის ჩაწოდებით კვლავ საბანაძე იყო ახლოს ანგარიშის გათანაბრებასთან, მაგრამ ნიკამ გარედან მოარტყა ბურთი ბადეს. 90 წუთის ამოწურვის შემდეგ სათადარიგო მსაჯმა ტაბლოზე 4 წუთი აანთო, რომლის განმავლობაში „ტორპედოს“ შეტევები ტრიბუნიდან ორჯერ შემოგდებული „მეორე“ ბურთის გამო ჩაიშალა, მიუხედავად ამისა, ყრუაშვილმა კომპენსირებულ დროს არც ერთი წამი(!) აღარ დაამატა და სასტვენს საფინალოდ ჩაჰბერა. პარადოქსული ფაქტია, რომ „დილამ“ ერთადერთი ზუსტი დარტყმით მატჩი, ანგარიშით 2:1 მოიგო, რითაც სატურნირო ცხრილში პირველ ადგილზე გადაინაცვლა.
XVII ტური 01.03.2015 15:00 დილა 2:1 ტორპედო
XVI ტური 22.02.2015 19:00
ტორპედო 0:0 კოლხეთი
მატჩის შესახებ
შეხვედრას, რომელიც ხელოვნურ განათებაზე მიმდინარეობდა, 3 500-მდე ქუთაისელი გულშემატკივარი დაესწრო. აღსანიშნავია, რომ უმაღლეს ლიგაში დღეს დებიუტი ჰქონდა ტორპედოელ ბექა ბანძელაძეს. მატჩის პირველი წუთები ისევე, როგორც პირველი ტაიმი ერთიანობაში თანაბარ ორთაბრძოლებში მიმდინარეობდა. მე-4 წუთზე, საბანაძე 15 მეტრიდან კარში გზავნიდან ბურთს, რომელიც ჰაერში ოპონენტ მცველს შეეხო და სანტიმეტრებით ასცდა კარს. შემდგომი 15 წუთი ფოთელთა აქტიურობით გაგრძელდა, შედეგად, ორჯერ ჯიქიამ ააცილა შორიდან მიზანს, კილასონიასა და ამბროლაძის დარტყმებით კი შეყრილაძეს მოუწია თამაშში ჩართვა. 21-ე წუთზე, ტუღუშმა გაუშვა დაბალი ტრაექტორიით კარში, ბურთი მეკარემ დაიმორჩილა. გატანის შემდეგი შანსი კლიმიაშვილს მიეცა, ირაკლიმ სახიფათოდ, მაგრამ არაზუსტად დაარტყა. ტაიმი კირკიტაძის უშედეგო მცდელობით დასრულდა, მან მაღალ ბურთზე მოხერხებულად ვერ იმოქმედა.

მეორე ტაიმში თამაშის სურათი შეიცვალა. ქუთაისელებმა შეტევა გააძლიერეს. 46-ე წუთზე, ჩიკვილაძის მიერ ფლანგიდან ჩაწოდებულს საბანაძე გამოეხმაურა, რომელმაც მცველთან ჭიდილში დარტყმით ბურთი გარედან მოარტყა კარის ბადეს. აქედან ერთ წუთში კვერნაძემ მეკარეს გაარტყა ბურთი, დამატებაზე კი კირკიტაძეს ჩადუნელი გადაეღობა. არ გასულა წუთი და „სტანდარტის“ შემდეგ კარის სიახლოვეს მყოფმა საბანაძემ ოდნავ შეუცვალა ბურთს მიმართულება, სტუმრები სეფიაშვილმა იხსნა. 55-ე წუთზე, შეყრილაძემ შენგელიას დარტყმებით ორჯერ უშეცდომოდ ითამაშა. 67-ე წუთზე, საბანაძეს სულ ცოტათი უმტყუნა მიზანმა, არადა მისი ჩანაფიქრის განხორციელების შემთხვევაში მეკარე უძლური იქნებოდა. „ტორპედო“ გამოკვეთილ უპირატესობას დაეუფლა, თუმცა „კოლხეთის“ რამდენიმე კონტრშეტევა საკმაოდ მწვავე იყო. მატჩის, ალბათ, ყველაზე რეალური საგოლე მომენტები 68-ე წუთზე შეიქმნა, ჯერ იყო და ბაბუნაშვილის პასით მეკარესთან პირისპირ გასულმა კვერნაძემ ვერ აჯობა სეფიაშვილს, იქვე კუთხური დაინიშნა, რასაც ქიმაძის მიერ საჯარიმოში ბურთის ჩაბრუნება და ჩიკვილაძის ოდნავ არაზუსტი თავური მოჰყვა. 77-ე წუთზე, ჩვენმა გუნდმა, კერძოდ კი, ჭელიძემ ლამაზად კი მოათავსა ბურთი მოწინააღმდეგის კარში, მაგრამ ამ წამამდე არბიტრს ჩიკვილაძეზე ჯარიმა დაეფიქსირებინა და გოლიც გაუქმდა. აქვე უნდა ვთქვათ, რომ სანოძის ეს გადაწყვეტილება ძალზედ საეჭვო გახლდათ. სჯობს, ჩვენს ვებ-გვერდზე განთავსებულ მატჩის ვიდეოჩანაწერში თავად ნახოთ - მეორე ტაიმის 34:40 წუთზე. ბოლო წუთებში დაძაბულობასთან ერთად ვნებათაღელვამაც იმატა. ტორპედოელთაგან ბაბუნაშვილმაც სცადა ორჯერ შორიდან გატანა, რაც არ გამოუვიდა. 81-ე წუთზე, სეფიაშვილმა კიდევ ერთხელ არ გაატანინა კვერნაძეს, დამატებაზე კი ჩიკვილაძემაც ვერ იხეირა. საბოლოოდ, "კოლხეთმა" თავი ბოლომდე დაიცვა და „ტორპედოს“ უპირატესობა მხოლოდ სტატისტიკურ მონაცემებში აისახა. მსაჯის სასტვენმა ნულოვანი ფრე გვამცნო, თუმცა, მიუხედავად „მშრალი“ ანგარიშისა, ტრიბუნებზე შეკრებილმა ქომაგებმა საკმაოდ საინტერესო და სანახაობრივი თამაში, განსაკუთრებით მეორე ტაიმში იხილეს.
XVI ტური 22.02.2015 19:00 ტორპედო 0:0 კოლხეთი
XV ტური 07.12.2014 14:00
ტორპედო 0:1 მეტალურგი
0:1 გიორგი ქავთარაძე 89'
მატჩის შესახებ
ძლიერმა ქარმა შეხვედრის სცენარზე მნიშვნელოვნად იმოქმედა. აქედან გამომდინარე მატჩის, რომლის პირდაპირ რეპორტაჟს გულშემატკივრებმა საზოგადოებრივი მაუწყებლის პირველ არხზე ადევნეს თვალი, სანახაობრივი მხარე ძალზე დაბალი იყო, რაც არა მარტო უამინდობას უნდა დაბრალდეს. ფაქტობრივად, პირველ ტაიმში საგოლე მომენტი არ ყოფილა. ეგ კი არა, სამსვლიანი კომბინაციებიც კი იშვიათი იყო. თითქმის თანაბარი თამაშის მსვლელობისას ორჯერ სტუმრებმა დაარტყეს მეტ-ნაკლებად სახიფათოდ, ერთხელ კი მასპინძლებმა, სამივე მცდელობამ უშედეგოდ ჩაიარა. მეტი ყურადღების გასამახვილებელი აღარაფერი მომხდარა.

უღიმღამო თამაში მეორე ტაიმშიც გაგრძელდა. დაწყებისთანავე და ცოტა უფრო მოგვიანებით თამაშში „ტორპედოს“ თადარიგები: ლევან შენგელია და გიორგი გიორგაძე ჩაერთვნენ. მათთვის ეს მატჩი უმაღლეს ლიგაში სადებიუტო იყო. 47-ე წუთზე, შორი მანძილიდან მარკოზაშვილმა დაარტყა ძლიერად, თუმცა არა კარში. მე-60 წუთზე, ტორპედოელი მცველების შეცდომით ბურთი სიხარულიძეს მიუვიდა, მისი სუსტი დარტყმით ცაბუტაშვილი ადვილად დაეუფლა ბურთს. ბოლო ნახევარ საათში „ტორპედომ“ ოდნავ გააუმჯობესა თამაში და მცირე უპირატესობაც მოიპოვა. გამოსარჩევი იყო სამწუთიანი ინტერვალით კვერნაძის მიერ მარჯვენა მახვილი კუთხიდან შესრულებული დარტყმები, მეკარე ბედიაშვილი ორივე დარტყმულს გაუმკლავდა. ყველაფერი ლოგიკური შედეგისკენ მიდიოდა, მაგრამ 89-ე წუთზე ფეხბურთისთვის სახასიათო მოულოდნელობაც მოხდა. რუსთაველთა კონტრშეტევა გიორგი ქავთარაძის გოლით დაბოლოვდა - 0:1. მთავარი მსაჯის საფინალო სასტვენმა „ტორპედოს“ მარცხი და წლის წარუმატებლად დასრულებაც გვამცნო.
XV ტური 07.12.2014 14:00 ტორპედო 0:1 მეტალურგი
XIV ტური 30.11.2014 14:00
შუქურა 2:1 ტორპედო
1:0 დავით ხოჭოლავა 52', 2:1 ზაზა ტუღუში 82' 1:1 გოგი ფიფია 65'
მატჩის შესახებ
ტრავმების გამო „შუქურასთან“ მატჩს ტრიბუნიდან ადევნეს თვალი ტორპედოელებმა ვაჟა ტაბატაძემ და ბექა ტუღუშმა. სიახლე იყო „ტორპედოს“ ძირითად შემადგენლობაში 20 წლის მეკარის, საბა ცაბუტაშვილის გამოჩენა, რომელსაც დღეს უმაღლეს ლიგაში დებიუტი ჰქონდა. თამაშის დასაწყისმა მასპინძელთა უპირატესობით ჩაიარა და უკვე დებიუტშივე მათ ორი რეალური საგოლე მომენტი გაანიავეს, უფრო კონკრეტულად ჩაფიძემ, რომელმაც ორივეჯერ ფეხით ვერ მოახვედრა მიზანში. მე-8 წუთზე, მეტრეველს დაუმორჩილა ბურთი ცაბუტაშვილმა. მე-11 წუთზე, ფიფიამ დაარტყა ძლიერად შორი მანძილიდან, ამჯერად თამაშში მეკარე კაკალაძე ჩაერთო და ბურთი ლამაზ ნახტომში მოიგერია კუთხურზე. მე-13 წუთზე, კვერნაძემ განახორციელა დრიბლინგი და ძალზედ მახვილი კუთხიდან დაარტყა კარში, მეკარეს ბურთის აღება არ გასჭირვებია. მე-17 წუთზე, კვერნაძეს თავითაც ჰქონდა კარის აღების მცდელობა, მაგრამ თოდუას ჩაწოდებით მან სანტიმეტრებით ააცილა კარს. „ტორპედოს“ პირველ ტაიმში მეტი გამოსარჩევი აღარაფერი შეუქმნია. „შუქურამ“ კი არაერთხელ შეაწუხა ტორპედოელი მეკარე, ყველაზე მეტჯერ ეს ჩაფიძემ გააკეთა(ამ უკანასკნელთან ერთად დღეს აქტიურები იყვნენ ექსტორპედოელები: გურული და კუხიანიძე), რომელმაც ერთხელ ძელსაც მოარტყა, თუმცა როგორც მან, ისე მისმა თანაგუნდელებმა ტაიმებს შორის შესვენებამდე გოლის გატანა ვერ მოახერხეს - 0:0.

მეორე ტაიმში სახიფათო მომენტებმა იკლო. მიუხედავად ამისა გოლები სწორედ დასკვნით მეორედში გავიდა. 52-ე წუთზე, „შუქურამ“ სტანდარტული მდგომარეობიდან შეძლო ანგარიშის გახსნა, საჯარიმოში ჩაწოდების შემდეგ ბურთი დავით ხოჭოლავამ ერთშეხებაში გადაგზავნა კარში - 1:0. მდევრი რანგში ჩავარდნილი „ტორპედო“ ოდნავ გამოფხიზლდა და ანგარიშიც გაათანაბრა: 65-ე წუთზე, ჩიკვილაძემ მარცხენა ფლანგიდან ჩაჰკიდა ბურთი საჯარიმოში, სადაც გოგი ფიფიამ შეასრულა ლამაზი თავური დარტყმა და ქუთაისელთა მაისურით ჩემპიონატში მისი პირველი გოლი გაიტანა - 1:1. თამაში თანაბარ ორთაბრძოლებში გაგრძელდა, თუმცა გადამწყვეტი აღმოჩნდა 82-ე წუთი, როცა მეკარესთან პირისპირ შუქურელი ზაზა ტუღუში გავიდა და მისი შედეგიანი დარტყმით საბოლოო ანგარიშიც დაფიქსირდა - 2:1. „ტორპედომ“ ჩემპიონატში ზედიზედ მე-8 მატჩი ვერ მოიგო, ამ წაგებით კი გათამაშების ცხრილში დაღმასვლა განიცადა და მე-12 ადგილზე ჩამოქვეითდა.
XIV ტური 30.11.2014 14:00 შუქურა 2:1 ტორპედო
XIII ტური 22.11.2014 14:00
ტორპედო 3:3 ზესტაფონი
1:1, 2:2 ოლეგ მამასახლისი 22', 35', 3:3 ოთარ კვერნაძე 63' 0:1 მიშიკო სარდალიშვილი 6', 1:2 გიორგი ილურიძე 26', 2:3 ჯაბა დვალი 37'
მატჩის შესახებ
დღევანდელ იმერულ დერბიში, რომელსაც „ტორპედოს“ წინა საშინაო მატჩის მსგავსად წვიმიანი ამინდი დაემთხვა, ჩვენმა გუნდმა ტრავმების გამო: ვაჟა ტაბატაძე, სევასტი თოდუა და ბექა ტუღუში მოისაკლისა, დისკვალიფიკაციის მიზეზით კი - ვალერი აბრამიძე. შეხვედრამ „ცენტრალურზე“ შეკრებილი ქომაგები სანახაობრივი თამაშის ცქერის თვალსაზრისით, გულგრილად ნამდვილად არ დატოვა. ამის წინაპირობა იყო ორივე გუნდის მწვრთნელთა, გია გეგუჩაძისა და რევაზ ძოძუაშვილის მიერ არჩეული შემტევი ფეხბურთი და ალბათ, ნაწილობრივ ისიც, რომ მოწინააღმდეგეთა დაცვის რგოლები დღეს მოწოდების სიმაღლეზე არ ყოფილა. ნალექის სახით წამოსულ წვიმასთან ერთად მატჩის პირველ ტაიმში გოლებიც „წვიმდა“. მე-6 წუთზე, ანგარიში მიშიკო სარდალიშვილმა გახსნა, ახლო მანძილიდან განმეორებითი ცდით - 0:1. 22-ე წუთზე, „ტორპედომ“ ოლეგ მამასახლისის ძლიერი და ნაყოფიერი დარტყმით უპასუხა, რომელმაც ბაბუნაშვილის კარგი პასით რამდენიმემეტრიანი დრიბლინგი განახორციელა და დაახლოებით 20 მეტრიდან უმაღლეს ლიგაში მისთვის სადებიუტო გოლი გაიტანა - 1:1. არ გასულა 4 წუთი და სტუმრები გიორგი ილურიძემ გაიყვანა წინ, თავური დარტყმით - 1:2. 28-ე წუთზე, ჩიკვილაძემ „სტანდარტიდან“ მამასახლისს ჩაუწოდა, ამ უკანასკნელმა გამოზომილად დაუხვედრა თავი ბურთს, რომელიც ხარიხამ უკუაგდო, დამატებაზე კი ბაბუნაშვილის თავურს ზესტაფონელთა ხორვატი მეკარე გაუმკლავდა. 35-ე წუთზე, მატჩზე დამსწრეთა შექების ადრესატი ისევ 18 წლის ოლეგ მამასახლისი გახდა, მე-6 ნომერმა გელაშვილის ჩაწოდებულზე თედორე გრიგალაშვილის მიერ უხეიროდ მოგერიებულზე მეკარეს დაასწრო რეაგირება და ბურთს თავით მიუჩინა მეტოქის კარში ადგილი - 2:2. ასეთი ანგარიში 3 წუთიც არ შენარჩუნებულა, როცა ზესტაფონელთა ფორვარდმა, კარის სიახლოვეს მყოფმა ჯაბა დვალმა მარჯვენა ფლანგიდან გაკეთებული პასი გამოიყენა - 2:3. გოლების გარდა, ფაქტობრივად, რეალური ხიფათი მხოლოდ ერთ ეპიზოდში, სტუმართა კართან შეიქმნა, როცა ფიფიას პასით კვერნაძე გავიდა თითქმის მეკარესთან პირისპირ, მაგრამ პავლოვიჩმა კარი დროზე დატოვა და ტორპედოელს კარში დარტყმის საშუალება არ მისცა.

თამაში მის მეორე ტაიმშიც საქართველოს ჩემპიონატისთვის უჩვეულოდ მიმზიდველი იყო. ისეთი, წამითაც რომ ვერ მოსწყვეტდა კაცი თვალს. ოღონდ, თუ პირველი ნაწილი გოლებით იყო დახუნძლული, მეორემ უფრო მეტად საგოლე მომენტებით დაგვამახსოვრა თავი. ორწუთიანი ინტერვალით გუნდებმა მომენტები გაცვალეს, ჩაკვეტაძის არაზუსტ თავურს ხელსაყრელი მანძილიდან დვალის არაზუსტი დარტყმა მოჰყვა. მალევე ფიფიამ გაისროლა შორიდან საკმაოდ სახიფათოდ და კარს სანტიმეტრებით გადააცილა ბურთი. მდევრის რანგში მესამედ მყოფმა „ტორპედომ“ 63-ე წუთზე კიდევ ერთხელ გაათანაბრა ანგარიში, ჩიკვილაძის შესრულებულ კუთხურზე ჩაკვეტაძემ დაარტყა თავით კარში, მეკარემ ბურთი ხელებში ვერ შეიმაგრა და ოთარ კვერნაძემ ეს შანსი ხელიდან არ გაუშვა - 3:3. 66-ე წუთზე, გარდაუვალი ჩანდა „ტორპედოს“ სასარგებლოდ ანგარიშის შეცვლა, მაგრამ ბაბუნაშვილი-კვერნაძის აქტიურობით ჩიკვილაძემ ისეთი მომენტი ვერ გამოიყენა, რომელიც „ტორპედოსთვის“ ყველაზე დასანანი იყო დღევანდელ შეხვედრაში. 68-ე წუთზე, თებიძემ ბრწყინვალე ნახტომში მოიგერია შარიქაძის მიერ ჯარიმიდან დარტყმული რთული ბურთი. 70-ე წუთზე, კვერნაძე ოპონენტს გაექცა და მარცხენა მხრიდან დაჰკრა, ბურთი მეორედ აისხლიტა ხარიხამ. მე-80 წუთზე, საჯარიმოში შესულმა კვერნაძემ ამჯერად მარჯვენა მხრიდან ვერ მოზომა დარტყმული. 85-ე წუთზე, მთავარ მსაჯ ნონიკაშვილს სრული უფლება ჰქონდა გვალია გაეძევებინა მოედნიდან, მაგრამ ხელით თამაშის გამო მან მეორე ყვითელი ბარათისთვის არ გაიმეტა ზემოიმერელთა ნახევარმცველი. მასპინძელთა მცირე უპირატესობის მიუხედავად, სტუმრებიც არაერთხელ ეცადნენ გამარჯვების გოლის გატანას, მაგრამ არბიტრის საფინალო სასტვენმა „ზესტაფონის“ საჩემპიონატო წაუგებელი სერიის 9-მდე, ხოლო „ტორპედოს“ მოუგებელისა კი 7-მდე გაზრდა გვამცნო - 3:3.
XIII ტური 22.11.2014 14:00 ტორპედო 3:3 ზესტაფონი
XII ტური 06.11.2014 14:00
სიონი 1:0 ტორპედო
1:0 გივი კვარაცხელია 55'
მატჩის შესახებ
შეხვედრას ქუთაისელები დიდი დანაკლისით ხვდებოდნენ, ძირითადი შემადგენლობის ფეხბურთელებიდან: ბექა ტუღუში და ოთარ კვერნაძე ტრავმების, ხოლო ნიკო კვასხვაძე კი მამის გარდაცვალების გამო ვერ იღებდნენ მონაწილეობას. დისკვალიფიკაცია ჰქონდა თენგიზ ჩიკვილაძეს, რომლის არყოფნაში „ტორპედოს“ კაპიტნის სამკლავურით წინ ვაჟა ტაბატაძე გაუძღვა.

თამაშის პირველი ტაიმი გარდამავალი უპირატესობით მიმდინარეობდა. „ტორპედომ“ პირველი ზუსტი დარტყმა მეტოქის კარში მე-8 წუთზე განახორციელა, კერძოდ, ეს გოგი ფიფიამ გააკეთა, რომელსაც მეკარემ მოუგერია. როგორც შემდეგში აღმოჩნდა, ეს ზუსტი დარტყმა ამ მატჩში უკანასკნელიც იყო სტუმართა მხრიდან. შემდეგი ეპიზოდი კი ყველაზე რეალური მათ შორის, რაც კი ქუთაისელებმა დღეს შექმნეს: მე-20 წუთზე, პირობითი მასპინძლები გოლს აშკარად გადაურჩნენ, ფიფიამ მარკოზაშვილისგან მიიღო ბურთი და ათიოდე მეტრიდან „მარცხენათი“ დაარტყა, მაგრამ დღესაც აქტიური ტორპედოელისთვის სასურველი ტრაექტორიით ბურთი არ წასულა. „სიონმა“, სულ ორჯერ დაარტყა კარისკენ, აქედან ერთხელ თებიძე ჩაერთო თამაშში. არც ერთ შემთხვევაში ეპიზოდს ხიფათი არ მოჰყოლია. საგოლე მომენტებს რომ თავი დავანებოთ, იშვიათად იყო გამწვავებებიც კი, როგორც ერთ, ისე მეორე კართან და შესვენებაზე გუნდები საყაიმო ანგარიშით გავიდნენ - 0:0.

მეორე ტაიმში თამაში უფრო საინტერესო გახდა. რევაზ ძოძუაშვილმა ქებურიას ნაცვლად მოედანზე თოდუა შეიყვანა, რომელიც მარჯვენა მცველად გაამწესა, ტაბატაძე კი შუა ნახევარმცველად გადაიყვანა. 49-ე წუთზე, მეტოქის ნახევარზე ბურთი აბრამიძემ მოიპოვა, ცოტაოდენი მანძილი ბურთიანად გაირბინა და მარცხნივ ფიფია მონახა, ამ უკანასკნელმა კი მის გვერდით - ბაბუნაშვილი, რომელმაც ბადეში გაახვია ბურთი, თუმცა გვერდით მსაჯს უკვე თამაშგარის მანიშნებელი ალამი ჰქონდა აწეული. გამეორებაზე ჩანს, რომ ზაალ ბერულავას გადაწყვეტილება ამ დინამიურ ეპიზოდში ძალზედ საკამათო იყო, თუმცა აქ, ქრონოლიგიას დავარღვევთ და მოგახსენებთ, რომ „ტორპედოს“ დღევანდელი მარცხის მსაჯზე დაბრალება უპრიანი არ იქნება. ბოლნისელებმა სწორედ ამის შემდეგ გააუმჯობესეს თამაშის ხარისხი. მათი ორი უშედეგო თავურის შემდეგ, მესამე ცდაზე სხეულის იგივე ნაწილით შესრულებული შედეგიანი დარტყმაც ვიხილეთ, 55-ე წუთზე, შორ მანძილზე დანიშნული „სტანდარტიდან“ კარისკენ ბურთის ჩაწოდებით გივი კვარაცხელიამ გახსნა ანგარიში - 1:0. დარჩენილ დროში გააქტიურებული „ტორპედო“ მეტოქეს კი ავიწროებდა, მაგრამ ღირებულს ვერაფერს ქმნიდა, პირიქით, წინ წასულებს რამდენიმე კონტშეტევა გამოეპარათ, რითაც „სიონმა“, რომელიც ამ ტურამდე ბოლო ადგილზე იყო, ორჯერ ძელს მოარტყა ბურთი, სამჯერ კი თებიძემ ითამაშა დამაჯერებლად. ეს იყო და ეს, „ტორპედომ“ ჩემპიონატში მესამე მარცხი განიცადა(0:1) და სატურნირო მდგომარეობაც მკვეთრად გაიუარესა.
XII ტური 06.11.2014 14:00 სიონი 1:0 ტორპედო
XI ტური 02.11.2014 18:00
ტორპედო 1:2 დინამო (თბ)
1:0 თენგიზ ჩიკვილაძე 28' 1:1, 1:2 ნიკოლოზ საბანაძე 66', 76'
მატჩის შესახებ
მიუხედავად 2-დღიანი გადაუღებელი წვიმისა, რომელიც არც მთელი მატჩის განმავლობაში შეწყვეტილა, უხვი ნალექი არ დატყობია „ცენტრალურის“ მინდორს, განსხვავებით ტრიბუნებისა, სადაც უამინდობამ თამაშზე დამსწრეები მოისაკლისა, თუმცა 3 000-მდე გულშემატკივარი თავიანთ სახლებში მაინც არ დარჩენილა... ტრადიციულად, ცალკე შეჯიბრება იყო ორივე გუნდის ქომაგთა კლუბებს შორის, ისინი არამარტო შეძახილებით, არამედ პიროტექნიკური საშუალებების გამოყენებითაც „ავსებდნენ“ „კლასიკოს“, რომელსაც მისი წინამორბედებივით დაძაბულობა არც ამჯერად აკლდა.

შეხვედრის დებიუტი სტუმართა ტერიტორიული უპირატესობით მიმდინარეობდა, რომელიც მალევე გაქრა. „ტორპედო“ მე-10 წუთიდან „აინთო“ და სახიფათო მომენტებიც სწორედ აქედან დაიწყო. 3-წუთიან მონაკვეთში მასპინძლები 4-ჯერ დაუმუქრნენ თბილისელთა კარს. ფიფიამ ერთხელ ააცილა, ერთხელაც მიგინეიშვილი გაუმკლავდა დარტყმულს. ამდენივე მომენტი ჰქონდა ბონდარენკოს, უკრაინელმა ჯერ ფეხით გაუშვა კარში ბურთი, რომელსაც დინამოელი მეკარე დაუფლა, ოდნავ მოგვიანებით კი თავური გამოუვიდა ოდნავ არაზუსტი. 27-ე წუთზე, ბაბუნაშვილმაც მოსინჯა მიგინეიშვილის მზადყოფნა, ამ უკანასკნელმა კუთხურზე მოუგერია ბურთი. რომ იტყვიან, გოლი „მწიფდებოდა“ და ლოგიკამაც არ დააყოვნა. 28-ე წუთზე, ბაბუნაშვილის მოწოდებულ კუთხურზე თენგიზ ჩიკვილაძემ მოხდენილად დაჰკრა ბურთს თავი და ეფექტურადაც აიღო მეტოქის კარი - 1:0. შეგახსენებთ, „ტორპედოს“ კაპიტნისთვის ეს ზედიზედ მეორე მატჩში განხორციელებული შედეგიანი თავური დარტყმა იყო, წინა ტურში მან „ჩიხურასაც“ არანაკლებ შთამბეჭდავად გაუტანა. მასთან ერთად დღეს ასევე გამორჩეულად აქტიურები იყვნენ ტაბატაძე, ფიფია და ტუღუში. ამის შემდეგ „დინამოს“ სათამაშო დისციპლინა ჩამოიშალა(კარისკენაც არ დაურტყამს შესვენებამდე) და ცოტა არ იყოს, სტუმარი გუნდი, რომელიც დღეს მთავარი მწვრთნელის, კახა გოგიჩაიშვილის გარეშე ეწვია ქუთაისს(მას მამა გარდაეცვალა), უსუსურად გამოიყურებოდა, შედეგად, ქუთათურები ძირითადად მრავალფეროვანი და ხშირი იერიშებით იყვნენ დაკავებულნი, მაგრამ ეს უპირატესობა მათ ანგარიშზე ვეღარ ასახეს და მეორე ტაიმში ყველაფერი საპირისპიროდ შეიცვალა...

თამაშის მეორე ნახევარში „ტორპედოს“ ბოლოდროინდელი უსიამოვნო ტრადიცია ისევ გაგრძელდა. „დინამო“ თანდათან გაუშინაურდა „ტორპედოს“ საჯარიმოს. გამაფრთხილებელი იყო 64-ე წუთზე ძარიას მიერ კარის მიმართულებით დარტყმა, დინამოელმა ოდნავ გადააცილა ბურთი კარს. 66-ე წუთზე კი სტუმრებმა აღარ ააცილეს და ნიკოლოზ საბანაძის გოლით ანგარიშიც გაათანაბრეს - 1:1. აქედან ათ წუთში ექსტორპედოელმა დუბლიც შეასრულა - 1:2. რევაზ ძოძუაშვილმა მატჩის გადასარჩენად თამაშში ოთარ კვერნაძე ჩართო, რომელიც პირველივე წუთიდან უნდა ყოფილიყო მოედანზე, მაგრამ დაწყებამდე ცოტა ხნით ადრე იგი ტრავმამ შეაწუხა. დარჩენილ დროში „ტორპედომ“ გაიბრძოლა. ტაბატაძის დარტყმით მიგინეიშვილს მოუწია რეაგირების მოხდენა. ფიფიამ კი ოდნავ ვერ მოზომა დარტყმა. მეტოქის მხრიდან კი ჩისკოს შექმნილ ხიფათს არ მოჰყოლია არაფერი. დამატებული 3 წუთიც იგივე ანგარიშით ამოიწურა და არბიტრის საბოლოო სასტვენმა „ტორპედოს“ 7-მატჩიანი წაუგებელი სერიის(აქედან 5 ფრე) შეწყვეტა გათამაშების ლიდერთან დააფიქსირა - 1:2.
XI ტური 02.11.2014 18:00 ტორპედო 1:2 დინამო (თბ)
X ტური 26.10.2014 15:00
ჩიხურა 2:2 ტორპედო
1:1 თორნიკე მუმლაძე 72', 2:2 შოთა კაშია 87' 0:1 თენგიზ ჩიკვილაძე 36', 1:2 ბექა ტუღუში 77'
მატჩის შესახებ
იმერულ დერბის ქარიანი ამინდი დაემთხვა. ამ პრობლემას ემატებოდა მძიმე მდგომარეობაში მყოფი მინდორიც, მიუხედავად ამისა, გუნდებმა საინტერესო თამაში უჩვენეს თავიანთ გულშემატკივრებს. პირველ ტაიმში(ისევე, როგორც მეორეში) მატჩს ტემპი არ დაეწუნებოდა, თუმცა სახიფათო მომენტების ნაკლებობა ნამდვილად იყო. საწყის ნახევარ საათში „ჩიხურა“ უკეთ გამოიყურებოდა, რისი დასტურიცაა მასპინძელთა უფრო მეტი საგოლე შანსი. ტრადიციულად, ქრონოლოგიას მივყვეთ: მე-15 წუთზე, ჩიკვილაძემ დაარტყა კარისკენ, ბურთს კაშიამ შეუცვალა მიმართულება და კინაღამ საკუთარ კარში ჩაჭრა იგი. აქედან ორ წუთში ფიფიამ საჯარიმოს მისადგომებიდან ძლიერად და უშედეგოდ დაარტყა. 23-ე წუთზე, დეკანოიძე, ფაქტობრივად, თებიძესთან პირისპირ გავიდა, მაგრამ ამ უკანასკნელმა მოსაწონი რეაქცია გამოავლინა და დარტყმული ბურთი მოიგერია. 27-ე წუთზე, ოდიკაძემ მიზანს ააცილა, ხოლო 30-ე წუთზე ღონღაძის კარში დარტყმული გააუვნებელყო „ტორპედოს“ მეკარემ. 36-ე წუთზე, ჩვენი გუნდის მეკარიდან დაწყებული შეტევა გოლით დაგვირგვინდა, კვერნაძე-ფიფია-ბაბუნაშვილის გავლით მარჯვენა ფლანგიდან ბურთი ტაბატაძემ ჩააწოდა კარის გასწვრივ, სადაც თენგიზ ჩიკვილაძემ მოიგო საჰაერო ორთაბრძოლა და თავით დალაშქრა მეტოქის კარი - 0:1. შესვენებაზე კოლექტივები ასეთი ანგარიშით გავიდნენ.

მეორე 45 წუთი გაცილებით უფრო მრავლისდამტევი გამოდგა. 54-ე წუთზე, ფიფიამ ორ ჩიხურელს აუარა გვერდი, საჯარიმოში შესულმა კი კარში სუსტად დაარტყა და ქვილითაიას არ გასჭირვებია სიტუაციის განმუხტვა. 63-ე წუთზე მასპინძელთაგან გამორჩეულმა ფეხბურთელმა, დეკანოიძემ „ტორპედოს“ კარის ძელს მოარტყა ბურთი, წამების შემდეგ თვითონვე ცდილობდა უკეთ დარტყმას, მაგრამ ასე არ გამოუვიდა. საჩხერელთა მცირე უპირატესობას 72-ე წუთზე ამ უკანასკნელის ვერა, თუმცა მისი თანაგუნდელის გოლი კი მოჰყვა, მოწოდებულ კუთხურს თორნიკე მუმლაძე გამოეხმაურა და 1:1. გაშვებული გოლის მიუხედავად, ქუთაისელები არ დაიბნენ, კვლავ დაირაზმნენ მეტოქის კარის ასაღებად და მალევე მათ საწადელს მიაღწიეს. 77-ე წუთზე, მატჩის მშვენება ბექა ტუღუშმა „გამოძერწა“, შეცვლაზე შესულმა ტორპედოელმა შესაშური ინდივიდუალური კლასი გამოავლინა, შედეგად, 4 ოპონენტი ფეხბურთელი ბურთიანად მოატყუა და სუპერგოლიც გაიტანა - 1:2. სამწუხაროდ, მეორედ დაწინაურებაც საკმარისი არ აღმოჩნდა იმისთვის, რომ სტუმრებს მატჩი მოგებამდე მიეყვანათ. 87-ე წუთზე, მარცხენა მხრიდან ჩაწოდებული ბურთი თებიძეს გადააფრინდა თავს ზემოთ(ამ ეპიზოდში ტორპედოელმა დღევანდელ შეხვედრაში მისი ერთადერთი შეცდომა დაუშვა) და შოთა კაშიას მიუვიდა, რომელმაც თავური დარტყმით ისევ აღადგინა წონასწორობა - 2:2. დარჩენილ დროში გამარჯვება ორივე გუნდს შეეძლო, მაგრამ ანგარიში არ შეცვლილა და „ტორპედომ“ კიდევ ერთი დასანანი ფრე ითამაშა - 2:2.
X ტური 26.10.2014 15:00 ჩიხურა 2:2 ტორპედო
IX ტური 19.10.2014 18:00
ტორპედო 2:2 გურია
1:0, 2:0 ოთარ კვერნაძე 34', 61' 2:1 ვალერი ბონდარენკო(ავტ) 62', 2:2 კობა შალამბერიძე(პენ) 80'
მატჩის შესახებ
თამაში მას შემდეგ დაიწყო, რაც „ცენტრალურზე“ მყოფმა პუბლიკამ წუთიერი დუმილით სტუმარი გუნდის აწ უკვე განსვენებული ფეხბურთელის, ნიკა კილაძის ხსოვნას მიაგო პატივი. რევაზ ძოძუაშვილმა 5-4-1 სათამაშო სქემა აირჩია და წინა ხაზში გამოკვეთილად კვერნაძე გაამწესა, რომელმაც მასზე დაკისრებული ამოცანა დღეს პირნათლად შეასრულა. საწყის წუთებში ფეხბურთელები ნელ ტემპში გადაადგილდებოდნენ მოედანზე. „ტორპედოს“ სითამამე მე-16 წუთზე ჩიკვილაძის ყუმბარისებული დარტყმით გამოჩნდა, ამ, მართლაც, ლამაზ ეპიზოდში მეკარე ზუხბაია ადგილზე დახვდა ბურთს. შეტევაზე ფიქრობდნენ გურულებიც, მათ პირველ ნახევარ საათში ქუთაისელთა კარის მიმართულებით რამდენიმეჯერ არაზუსტად დაარტყეს. 34-ე წუთზე, თებიძე მოექცა ყურადღების ცენტრში, მან გაბრიჭიძეს მოუგერია მეტად რთული ბურთი. ამ სიგნალზე „ტორპედომ“ უმალვე მოახდინა რეაგირება, საპასუხო იერიში წამოიწყო და დასკვნით ფაზაში ტაბატაძის პასით მცველების გარემოცვაში მყოფმა ოთარ კვერნაძემ გახსნა ანგარიში, ბურთის მიღებითა და მასზე მეორე შეხებით - 1:0. ძირითადად წვიმის ფონზე მიმდინარე ტაიმის დასრულებამდე ფიფიას მიეცა გოლის გატანის შანსი, მაგრამ კარში დარტყმულ ბურთს მცველმა ოდნავ შეუცვალა მიმართულება. შედეგი არ გამოუღია, კოშკაძისა და კვერნაძის ეფექტურ დარტყმებსაც, ამ უკანასკნელმა ჩიკვილაძის გენიალური გადაცემით ბურთს ჰაერშივე დაუხვედრა ფეხი.

მეორე ტაიმში დაძაბულობამ იმატა და თამაშიც უფრო სანახაობრივი გახდა. მიუხედავად ერთბურთიანი უპირატესობისა, ტორპედოელები ანგარიშის შენარჩუნებაზე მაინც არ ზრუნავდნენ, ამასთან, მეტოქესაც ეძლეოდა გათანაბრების შანსები: ერთწუთიან მონაკვეთში შალამბერიძემ ჯერ „მართკუთხედში“ ვერ მოახვედრა, მერე კი თებიძეს ვერ აჯობა. აქედან წამებში, 61-ე წუთზე, ბრწყინვალე კონტშეტევით ფიფიამ უზადო გადაცემა გაუკეთა ოთარ კვერნაძეს, რომელმაც დროულად დაარტყა და მარცხენა ფეხით „ცხრიანში“ გატანით დუბლი გაიფორმა - 2:0. სტუმრებმა ცენტრიდან განაახლეს თამაში თუ არა მათი პირველივე შეტევით საჯარიმოში ჩაწოდებული ბურთი ბონდარენკომ ჩაჭრა საკუთარ კარში და სხვაობაც შემცირდა - 2:1. მე-80 წუთზე კი კიდევ ერთი უხეში შეცდომა ქუთაისელებს ძვირად დაუჯდათ, „ტორპედოს“ კართან მყოფ ჩადუნელს ბურთი ხელზე მოხვდა, არბიტრმა პენალტი დანიშნა, რომელიც კობა შალამბერიძემ გამოიყენა - 2:2. აღსანიშნავია, რომ მეორე ტაიმში „ტორპედო“ არაერთხელ აპელირებდა თერთმეტმეტრიანის დანიშვნას, მაგრამ არც ერთი მათგანი დაკმაყოფილდა. ანგარიშის გათანაბრების შემდეგ „ტორპედომ“ რეალური მომენტი „სტანდარტით“ შექმნა, სტუმართა მეკარემ ბონდარენკოს მოუგერია თავური დარტყმით ბურთი. სამწუხაროდ, როგორც ჩემპიონატში წინა საშინაო მატჩში(ბათუმის „დინამოსთან“ 2:2), ისე დღესაც, ტორპედოელებმა ობურთიანი უპირატესობა ვერ შეინარჩუეს და ეს მატჩიც ფრედ დაასრულეს.
IX ტური 19.10.2014 18:00 ტორპედო 2:2 გურია
VIII ტური 05.10.2014 15:00
ზუგდიდი 0:0 ტორპედო
მატჩის შესახებ
თამაშის ორივე ტაიმი მოულოდნელი სცენარით წარიმართა. როგორც შეხვედრის პირველ ნაწილში, ისე დასკვნითში გათამაშების აუტსაიდერები რევაზ ძოძუაშვილის გაწვრთნილებს სახიფათო მომენტებით საკმაოდ ხშირად აწუხებდნენ, მაგრამ მათ მთავარი, გოლი ვერ გაიტანეს. ზუგდიდელთა უპირატესობის დასტურად მხოლოდ მატჩის სტატისტიკაც გამოდგება. რასაკვირველია, წინ გასვლის შანსები ტორპედოელებსაც ჰქონდათ, რომლებიც გამოუყენებელი დარჩა. თამაშის ეპილოგში ორივე გუნდის ფეხბურთელებს ერთ-ერთ ეპიზოდში ნერვების მოთოკვა გაუჭირდათ, რის გამოც არბიტრმა მიხეილ მახვილაძე და შოთა ლომია გააძევა მოედნიდან. მასპინძლებს ოდნავ რომ გამართლებოდათ, ჩემპიონატში ჩვენი გუნდის 4-მატჩიანი წაუგებელი სერია შეწყდებოდა, თუმცა, ჩვენდა სასარგებლოდ, საფეხბურთო ფორტუნამ ასე არ ინება და სერიაც გაგრძელდა - 0:0.
VIII ტური 05.10.2014 15:00 ზუგდიდი 0:0 ტორპედო
VII ტური 27.09.2014 16:00
ტორპედო 2:2 დინამო (ბთ)
1:0 ოთარ კვერნაძე 32', 2:0 ვალერი აბრამიძე 52' 2:1 გიორგი ბერიაშვილი 73', 2:2 ნიკა დიასამიძე 75'
მატჩის შესახებ
ტრადიციული კლუბების შეხვედრა მასპინძელთა შეტევებით დაიწყო. „ტორპედომ“ თავიდანვე პირველ ნომრად ყოფნა არჩია და თამაშის სადავეებსაც დაეუფლა. მე-5 წუთზე, მატჩის პირველი რეალური საგოლე მომენტი ბაბუნაშვილის პასით კვერნაძეს შეექმნა, რომელმაც 10 მეტრიდან კარში ვერ მოახვედრა ბურთი, თუმცა მსგავსი კომბინაცია 32-ე წუთზე დაგვირგვინდა გოლით, გადაცემის ავტორი, როგორც პირველ შემთხვევაში, იგივე იყო, ოთარ კვერნაძემ ამჯერად ფორვარდის ფუნქცია ჩინებულად შეასრულა - 1:0. ანგარიშის გახსნა უფრო ადრე დინამოელ ჭკუასელსაც შეეძლო, მაგრამ მას თებიძემ გამოუცნო დარტყმული ბურთის მიმართულება. ბერიაშვილისა და ტეტუნაშვილის დარტყმებით კი ბურთი კარს მიღმა წავიდა, ისევე, როგორც საპირისპირო მხარეს კვერნაძის მიერ საჯარიმოს წვეროდან გასროლით. ერთიანობაში მშვიდ ვითარებაში მიმდინარე პირველ ტაიმში მეტი გამოსარჩევიც არაფერი ყოფილა.

მეორე ტაიმი უკეთესი საცქერი გამოდგა. მის დასაწყისში პუბლიკის ყურადღება ბერიაშვილის მომენტებმა მიიპყრო, ყოფილმა ტორპედოელმა 2-ჯერ გაუშვა ხელიდან გათანაბრების შესაძლებლობა(ერთხელ მეკარემ აუღო ბურთი). მოვლენებს ოდნავ წინ გავუსწრებთ და თამაშის ბოლომდე ამ უკანასკნელმა კიდევ რამდენიმეჯერ შეასრულა შეტევის ბოლო დარტყმა. 52-ე წუთზე, ბაბუნაშვილის მოწოდებული კუთხური ვალერი აბრამიძემ, რომელიც „ტორპედოს“ კაპიტნობდა, თავური დარტყმით აქცია გოლად - 2:0. ქუთაისელებს საქმე მომთავრებული ეგონათ და რევაზ ძოძუაშვილის შეგირდებს მოდუნებაც შეეტყოთ, რაც მათ გააქტიურებულმა სტუმრებმა არ აპატიეს და 2-წუთიან მონაკვეთში 2 გოლით დასაჯეს, ავტორები: გიორგი ბერიაშვილი და ნიკა დიასამიძე გახდნენ - 2:2. აქამდე, ბათუმელთაგან სხვებმაც დაარტყეს კარისკენ, კერძოდ, ჩირიკაშვილმა და მუჯირმა. ცოტა ხანში „ტორპედო“ ოდნავ გონს მოეგო. მე-80 წუთზე, ტაბატაძის, რომელსაც დღეს დიდი დატვირთვა ჰქონდა, ჩაწოდებით კვერნაძეს მართებდა ქუთაისელი გულშემატკივრები სახლებში გახარებული გაეშვა, მაგრამ ახლო მანძილიდან დარტყმით მან დუბლი ვერ შეასრულა. აღსანიშნავია, რომ ტორპედოელ მეკარეს რომ არ ევარგა, შეიძლებოდა, ყველაფერი თავდაყირა დამდგარიყო. მატჩის ბოლო მომენტი კი ფიფიას ჰქონდა, მე-10 ნომერმა კარგად კი გაიყვანა საკუთარი თავი ხელსაყრელ პოზიციაზე, თუმცა თითქმის საჯარიმოს ხაზიდან მის დარტყმულს ოდნავ სიზუსტე დააკლდა. საბოლოოდ, „ტორპედო“ ფრეს დასჯერდა(2:2), რითაც ცხრილში მე-2 ადგილზე დაბრუნებისა და გათამაშების ლიდერ თბილისის „დინამოსთან“ ქულათა სხვაობის შემცირების შანსიც ქარს გაატანა.
VII ტური 27.09.2014 16:00 ტორპედო 2:2 დინამო (ბთ)
VI ტური 21.09.2014 16:00
სამტრედია 0:1 ტორპედო
0:1 ოთარ კვერნაძე 87'
მატჩის შესახებ
უმაღლეს ლიგაში დაბრუნებულ იმერულ დერბიზე ანშლაგი იყო. ტრიბუნებზე მყოფ 2 500-მდე გულშემატკივართა შორის საკმაოდ ბევრი ქუთაისელი ქომაგიც გახლდათ, რომლებიც ხშირი შეძახილებით ამხნევებდნენ თავიანთ საყვარელ გუნდს. „ტორპედო“ მატჩს დანაკლისით შეხვდა - კაპიტანი თენგიზ ჩიკვილაძე ჯანმრთელობასთან დაკავშირებული პრობლემების გამო ვერ ეხმარებოდა თანაგუნდელებს. მის მაგივრად გუნდს ტრავმამოშუშებულმა ვალერი აბრამიძემ უკაპიტნა. „ტორპედოს“ რიგებში დებიუტი ჰქონდა უკრაინელ ილია დრევალს. 18 წლის ახალწვეულმა დღეს საყრდენი ნახევარმცველის პოზიციაზე ითამაშა.

შეხვედრის პირველი ტაიმი მოსალოდნელი სცენარით წარიმართა. ახალი ფეხბურთელებით გაძლიერებული „სამტრედია“ ყველა სათამაშო კომპონენტში ფლობდა უპირატესობას, თუმცა ბოლო ფაზაში მასპინძელ ფეხბურთელებს სიზუსტე არ ჰყოფნიდათ. საწყის 25 წუთში მარტო ბეჭვაიასა და გეწაძის მომენტებს თუ დავაჯამებთ, ისინი 6-ჯერ იყვნენ ახლოს ანგარიშის გახსნასთან. შემდეგ თითოჯერ მელქაძეს, ბაკურაძესა და კაკუბავასაც შეეძლოთ მათი გუნდის დაწინაურება, მაგრამ არარეალიზებულ შეტევებში მთავარი „დამნაშავე“ მეკარე თებიძე იყო, რომელსაც ზედიზედ მესამე თამაშია გოლი არ გაუშვია. „სამტრედიას“ მასირებული იერიშების ფონზე იყო მოლოდინი, რომ „ტორპედო“ დიდხანს ვეღარ შეინახავდა კარს „მშრალად“ და ქუთაისელთათვის უკეთეს შემთხვევაში კი ფრეს მიაღწევდა, თუმცა წინ მეორე ტაიმი იყო...

მატჩის დასკვნითი მეორედი პირველისგან განსხვავებული გამოდგა. თამაში გათანაბრდა და „ტორპედოც“ გაცილებით უფრო გამოცოცხლდა. მეტ-ნაკლებად სახიფათო მომენტები შეექმნათ ბონდარენკოს, აბრამიძესა და ჩაკვეტაძეს, მაგრამ ყველა მათგანი უშედეგო აღმოჩნდა. შიგადაშიგ პასუხობდნენ სამტრედიელებიც, მელქაძემ და ქანთარიამ ბურთი კარში ვერ მოახვედრეს, ახლო მანძილიდან გორგიაშვილის დარტყმულზე კი თებიძემ კიდევ ერთხელ გამოავლინა დამაჯერებლობა. უკომპრომისო ორთაბრძოლები ბოლომდე გაგრძელდა. „ტორპედოს“ უკეთესი ფიზიკური მომზადება განსაკუთრებით თამაშის ეპილოგში გამოჩნდა. 83-ე წუთზე, შეცვლაზე შესულმა კვერნაძემ ბაბუნაშვილის პასი მიიღო და მეტოქის საჯარიმოში მარჯვენა კუთხიდან შეიჭრა, ტორპედოელს ხელს არავინ უშლიდა, თუმცა მის დარტყმულზე მეკარემ იყოჩაღა. აქედან ოთხ წუთში, „ტორპედოს“ კომბინაცია გოლით დაგვირგვინდა, ტაბატაძემ აბრამიძესთან გაითამაშა „კედელი“, ვაჟამ ცრუ მოძრაობით ოპონენტი მოატყუა და კარის გასწვრივ ჩააწოდა, სადაც ოთარ კვერნაძემ დაუხვედრა ბურთს თავი, მეკარე მოძრაობაზე დაიჭირა და საპირისპირო კუთხეში დარტყმით დალაშქრა კარი - 0:1. დარჩენილ წუთებში არაფერი შეცვლილა და არბიტრ სილაგავას, რომელსაც ამ მატჩში თითქმის შეცდომა არ დაუშვია, საფინალო სასტვენმა ქუთათურების მნიშვნელოვანი გამარჯვება დააფიქსირა, შედეგად, რევაზ ძოძუაშვილის გაწვრთნილი გუნდი მეორე ადგილზე გადავიდა.
VI ტური 21.09.2014 16:00 სამტრედია 0:1 ტორპედო
IV ტური 16.09.2014 16:00
ტორპედო 1:0 ვიტ ჯორჯია
1:0 ვალერი ბონდარენკო 88'
მატჩის შესახებ
ძირითადად მზიან ამინდში მიმდინარე საინტერესო შეხვედრის დებიუტი ქუთაისელთა აშკარა უპირატესობით წარიმართა. პირველი ტაიმის განმავლობაში „ცენტრალურის“ ტრიბუნებზე შეკრებილები საკმაოდ ხშირად ხმაურობდნენ, რაც უმეტესად „ტორპედოს“ მიერ შექმნილი სახიფათო მომენტებით იყო გამოწვეული. უკვე მე-2 წუთზე მასპინძელთა სწრაფი გადასვლა მეტოქის ნახევარზე ტუღუშის კარში დარტყმით ბოლოვდებოდა, რომ არა ერთ-ერთი ოპონენტი მცველი, რომლისგანაც კუთხურზე გადავიდა ბურთი. აქედან ერთ წუთში ჩიკვილაძემ ზედიზედ მეორე კუთხური მოაწოდა, კართან ახლოს ყველას კვერნაძემ დაასწრო, მაგრამ თავით მიზანში ვერ მოარტყა. მე-17 წუთზე, ისევ კვერნაძე შევიდა სტუმართა საჯარიმოში მარჯვენა კუთხიდან და ამჯერად მეკარეს ვერ აჯობა. 34-ე წუთზე, ვიტელთა საჯარიმოში მყოფმა ტუღუშმა აკრობატული დარტყმით სცადა გატანა, მაგრამ შეროზიამ რთული ბურთი მოიგერია. საწინააღმდეგო კართან შექმნილ ეპიზოდებზეც რომ ვთქვათ, 45 წუთი ისე მიიწურა, რომ ტორპედოელ მეკარეს სერიოზული საქმე არ მისცემია, რადგან სტუმართა 2-3 დარტყმით ბურთი „მართკუთხედის“ მიღმა წავიდა. ყველაზე მაღალპროცენტიანი შანსი გეთიაშვილს ჰქონდა, რომელმაც ვარდნაში 4-5 მეტრიდან ააცილა კარს.

15-წუთიანი შესვენების შემდეგ პირველი 20 წუთი არაფრით იყო გამორჩეული. თითქოს, სტუმრები უფრო გააქტიურდნენ, თუმცა ეს მხოლოდ ბურთის ფლობაში ჩანდა. 66-ე წუთზე, ტაბატაძემ მისივე ფლანგიდან ჩააწოდა ბურთი, რომელსაც თავით ჩადუნელი გამოეხმაურა და მას სულ ცოტა დააკლდა ანგარიშის გახსნამდე. 77-ე წუთზე, ბონდარენკოს მიერ შესრულებული საჯარიმოთი ბურთი მეკარემ დაიმორჩილა ხელებში. აქედან წამებში, ჩიკვილაძემ საჯარიმოს მისადგომებიდან დარტყმით შეაზანზარა ხარიხა. თამაშის ფინალი მეტად დაძაბული გამოდგა, ამან ფეხბურთელებზეც ზედმეტად ემოციურად იმოქმედა, რისთვისაც მათ მთავარი მსაჯისგან ყვითელი ბარათები მიიღეს. „ტორპედო“ ფრეს არ ეგუებოდა და რისკზეც გადავიდა. თამაშის კულმინაცია 88-ე წუთზე იყო, როცა ფიფიამ ცრუ მოძრაობების შემდეგ კარის გასწვრივ ჩასაწოდებლად არეალი გაითავისუფლა, ჩააწოდა და... ჩვენი გუნდის მიერ მეტოქის კარში განხორციელებულმა მე-9 დარტყმამ შედეგი გამოიღო. 20 წლის უკრაინელი ვალერი ბონდარენკო საჭირო ადგილას აღმოჩნდა და ლამაზი თავური დარტყმით იგი მისი პირველი ქუთაისური(ოფიციალური) მატჩის გამარჯვების გოლის ავტორი და ამასთან, საუკეთესო მოთამაშეც გახდა. არბიტრის საბოლოო სასტვენმა ჩემპიონატში ქუთათურების 3-მატჩიანი მოუგებელი სერია შეწყვიტა და დამსახურებული გამარჯვება დააფიქსირა - 1:0.
IV ტური 16.09.2014 16:00 ტორპედო 1:0 ვიტ ჯორჯია
V ტური 12.09.2014 16:00
სპარტაკი 0:0 ტორპედო
მატჩის შესახებ
„ტორპედოს“ სამატჩო შემადგენლობას ტრავმების გამო ვალერი აბრამიძე, ალექსი ბენაშვილი, ნიკო კვასხვაძე აკლდნენ. პირველი მათგანის არყოფნა რევაზ ძოძუაშვილმა 19 წლის უკრაინელი მცველით, ვალერი ბონდარენკოთი შეავსო, რომლის დებიუტიც გარდა ჩვენი გუნდისა, ქართულ ჩემპიონატშიც შედგა. შეხვედრის დასაწყისში „ტორპედო“ დომინირებდა, თუმცა მალევე „სპარტაკმა“ თამაში გაათანაბრა. მატჩის საუკეთესო მომენტებიდან პირველი, მე-10 წუთზე, დამუშავებული კომბინაციით შეიქმნა, ჩიკვილაძემ შეასრულა საჯარიმო დარტყმა, რომელმაც მეტოქის კარის საპენალტოსთან ფიფიას დაუგორა დაბალი ტრაექტორიით, მე-10 ნომერმა კი მეორე შეხებით ხარიხას გაარტყა ბურთი. ამას მოჰყვა მასპინძელთა გააქტიურება, შედეგად, რამდენიმეჯერ 19 წლის ტორპედოელ მეკარეს მოუწია თავისი შესაძლებლობების გამოვლენა. მატჩის ყველაზე უფრო განსახილველი ეპიზოდი 26-ე წუთზე მოხდა, როცა „ტორპედოს“ სწრაფი კონტრშეტევის შემდეგ ჩაკვეტაძე აღმოჩნდა მეკარესთან პირისპირ, მეკარესთან, რომელიც საკუთარი კარიდან დაახლოებით 45 მეტრის მოშორებით იყო გამოსული, ტორპედოელი საჭირო ადგილზე ოპონენტზე ადრე მივიდა და კარში დარტყმაც გადაწყვიტა, მაგრამ მეკარეს ვერ ააცილა ბურთი, ამ უკანასკნელის მოგერიებულს თავადვე ამატებდა გაცილებით უფრო რთული ადგილიდან, იმ დროს კი უკვე ნადირაძე საჯარიმოში იყო და ბურთის აღება არ გასჭირვებია, თუმცაღა მას თანაგუნდელებიც აზღვევდნენ. პირველი ტაიმის ბოლოს ხელსაყრელი პოზიციიდან შინდაგორიძეს შეეძლო ანგარიში გახსნა, მაგრამ თებიძე ადგილზე დახვდა დარტყმულს და გუნდები შესვენებაზე უგოლოდ გავიდნენ.

საინტერესო პირველის შემდეგ მეორე ტაიმმა სანახაობრივი თამაშის მხარდამჭერებს იმედები გაუცრუა. თამაშის ტემპი თანდათან ეცემოდა და შეხვედრაც მხოლოდ პერიოდული „გამონათებებით“ გვახსენებდა თავს. „სპარტაკი“ შორიდან ცდილობდა დაწინაურებას, მაგრამ თებიძე მათ ჩანაფიქრების განხორციელების საშუალებას არ აძლევდა. ერთიანობაში, შესამჩნევად უფრო მეტი რეალური საგოლე მომენტი „ტორპედოს“ ჰქონდა. ქუთაისელები ამის შემდეგ 4-ჯერ დაემუქრნენ მეტოქის კარს: 63-ე წუთზე, ბაბუნაშვილის მოჭრილი დარტყმა მცირედიდ არაზუსტი გამოდგა. 75-ე წუთზე, ფიფიას პასით ტაბატაძე ურტყამდა საჯარიმოს მისადგომებიდან, მაგრამ ვაჟამ „მარცხენათი“ ოდნავ ზედმეტად ზემოთ გაუშვა ბურთი. 81-ე წუთზე, ფიფიამ კარგად დაამუშავა ბურთი სპარტაკელთა საჯარიმოსთან, დარტყმა კი მასაც არაზუსტი გამოუვიდა. 90-ე წუთზე, დებიუტანტ ბონდარენკოდ შეეძლო მატჩის გმირი გამხდარიყო, მას შემდეგ, რაც მოწოდებული კუთხურით ბურთი მიიღო და 12-13 მეტრიდან დარტყმით გატანის მშვენიერი შანსი ვერ გამოიყენა. საბოლოოდ, მსაჯის საფინალო სასტვენმა ნულოვანი ფრე დააფიქსირა - 0:0.
V ტური 12.09.2014 16:00 სპარტაკი 0:0 ტორპედო
III ტური 24.08.2014 17:00
მერანი 3:1 ტორპედო
1:0 ბესიკ ჩიმაკაძე 36', 2:0 პაპუნა ფონიავა 47', 3:0 ბესიკ ჩიმაკაძე 78' 3:1 ოთარ კვერნაძე 90+3'
მატჩის შესახებ
შეხვედრის დაწყებას წინ უძღვოდა წუთიერი დუმილი, რითაც გუნდებმა აწ უკვე განსვენებულ ქუთაისელ მწვრთნელ ბესიკ ბრეგაძის ხსოვნას მიაგეს პატივი. თამაში საშუალო ტემპში დაიწყო. პირველ ათ წუთში პირობითი მასპინძლები უკეთ გამოიყურებოდნენ, თუმცა ამ მონაკვეთში სასარგებლო მათ ვერაფერი მიიღეს. საზოგადოდ, დღევანდელ დუელში არაერთი გარდამტეხი მომენტი იყო, რომლის გახსენებაც შეიძლება. მათ შორის პირველი მე-12 წუთზე მოხდა: ტაბატაძემ მისივე ფლანგიდან ფიფიას მისამართით გაკეთებული გონივრული გადაცემით „მერანის“ დაცვა მთლიანად „მოჭრა“, თუმცა ტორპედოელმა ფორვარდმა სანტიმეტრებით ააცილა ახლო მანძილიდან კარს ბურთი და გატანის მაქსიმალურპროცენტიანი შანსიც გაანიავა. შესვენებამდე(და მის შემდეგაც) „ტორპედოს“ ბევრი ნახევარმომენტი შეექმნა, რომელთა მესამედი მაინც რომ გამოეყენებინა, ალბათ, ეს რაოდენობა თამაშის მოგებისთვის საკმარისი იქნებოდა. ბევრი ეპიზოდი იყო ისეთი, როცა ტორპედოელთა გადამწყვეტი პასები ჩაიჭრა. 30-ე წუთზე, ბობღიაშვილმა ჩიმაკაძეს მოუგერია რთული ბურთი, მალევე კი ამ უკანასკნელისთვის „კარგი საჩუქარი“ გამოუვიდა. ქრონოლოგიას არ დავარღვევთ და იქამდე კვერნაძე-ფიფიას კომბინაციაზე მოგახსენებთ, რის შემდეგაც ხელსაყრელი ადგილიდან პირველმა მათგანმა დაარტყა ოდნავ არაზუსტად. რაც შეეხება ზემოთ ნახსენებ მომენტს, 36-ე წუთი მიმდინარეობდა, „მერანის“ ერთ-ერთი ფეხბურთელის ჩაწოდებულ ბურთზე ტორპედოელ მეკარეს უნდა ეთამაშა, მაგრამ გამოსვლისას იგი შეცდა და ბესიკ ჩიმაკაძემაც ცარიელ კარს დაუმიზნა - 1:0. მე-40 წუთზე, კვერნაძეს ჰქონდა ანგარიშის გათანაბრების შესაძლებლობა, მარჯვენა მახვილი კუთხიდან მისმა დარტყმულმა ბურთმა შორეულ კუთხეს ახლოს ჩაუარა.

მეორე ტაიმის დასაწყისში ქუთაისელებმა შეტევითი ხაზი გააძლიერეს, აღნიშნულის გათვალისწინებით, მოვლენები ცოტა არ იყოს მოულოდნელად განვითარდა. 47-ე წუთზე, ლამაზი გოლი ვიხილეთ, სამწუხაროდ, ჩვენი გუნდის კარში, ეს პაპუნა ფონიავას შორეულ დარტყმას მოჰყვა - 2:0. 58-ე წუთზე, რევაზ ძოძუაშვილის გაწვრთნილები „მერანის“ ერთ-ერთი მცველის მიერ მისივე გუნდის საჯარიმოში ხელით თამაშს აქტიურად აპელირებდნენ, მაგრამ მსაჯმა მომენტი უხმოდ გაატარა. შემდგომა ამისა, თამაში მთლიანად „ტორპედოს“ დომინირებით გაგრძელდა. ჩვენმა გუნდმა მარტვილელთა კართან ხანგრძლივი შტურმი მოაწყო, თუმცა ფეხბურთელებს ბოლო ფაზაში შედეგიანი დარტყმები აშკარად უჭირდათ. აი, რამდენ ტორპედოელს შეექმნა მეტ-ნაკლებად საგოლე მომენტი: ტუღუშს(ორჯერ), ბაბუნაშვილს(ორჯერ), ფიფიას, მარკოზაშვილს, კვერნაძესა და ორჯერ ჩიკვილაძეს(განსაკუთრებით მისი მომენტები იყო დასანანი). ამდენი გამოუყენებელი მომენტის გამო „ტორპედო“ კიდევ ერთხელ დაისაჯა, 78-ე წუთზე, შულაიას პასით ბესიკ ჩიმაკაძემ შეასრულა დუბლი - 3:0. მსაჯის მიერ კომპენსირებულ დროში „ტორპედომ“ ერთი გოლის გაქვითვა მოახერხა, დასწრებაზე ზუსტი თამაშით თავი ოთარ კვერნაძემ გამოიჩინა და საბოლოო ანგარიშიც ასე დაფიქსირდა(3:1) და "ტორპედომ" ჩემპიონატში პირველი მატჩი წააგო.
III ტური 24.08.2014 17:00 მერანი 3:1 ტორპედო
II ტური 15.08.2014 17:30
ტორპედო 0:0 დილა
მატჩის შესახებ
დღევანდელი შეხვედრა საინტერესო იყო იმ თვალსაზისითაც, რომ უმაღლესი ლიგის გუნდებში მომუშავეთა შორის ერთმანეთის პირისპირ ყველაზე ასაკიანი და ახალგაზრდა მთავარი მწვრთნელები წარსდგნენ. მათი შეგირდების ურთიერთპაექრობა ქუთაისური ხვატის ფონზე მიმდინარეობდა, რამაც მატჩზე დიდი გავლენა იქონია. წარმოსადგენადაც ადვილია თუ თამაშის როგორი ტემპი იქნებოდა თითქმის 40 გრადუს სიცხეში. ფეხბურთელებზე რომ არაფერი ვთქვათ, ტრიბუნებზე მყოფ გულშემატკივრებსაც კი უჭირდათ სულის მოთქმა. სწორედ ამიტომ 2-ჯერ მოუწია მთავარ მსაჯს იძულებითი შესვენების გამოცხადება.

თუმცა მარტო პაპანაქებას არანაირად არ უნდა დაბრალდეს ის ხარვეზები, რომლებიც ორივე გუნდის თამაშში ხშირად იყო შესამჩნევი. მატჩის მთლიანი სურათი ასეთი გახლდათ: „ტორპედო“ ტერიტორიულ უპირატესობას ფლობდა და მოედნის ბოლო მესამედში მეტოქეზე გაცილებით უფრო მეტად ცდილობდა სიტუაციის გამწვავებას, რაც მეტწილად არ გამოსდიოდა. სტუმრებს კი, კარში დარტყმით, ფაქტობრივად, ერთხელაც არ შეუწუხებიათ მეკარე ბობღიაშვილი. სულ რაღაც რამდენიმე საგოლე მომენტიდან პირველი ჩიკვილაძეს შეექმნა, რომელსაც 20 მეტრის მანძილიდან დარტყმული ბურთი მეკარემ მოუგერია. მალევე, „ტორპედოს“ კაპიტნის მიერ მარცხენა კიდიდან კარის გასწვრივ გაკეთებული გადაცემა ერთ-ერთმა გორელმა ფეხბურთელთა საკუთარ კინაღამ ჩაჭრა, ბურთი გარედან მოხვდა ბადეს. შემდეგ იყო „სტანდარტიდან“ ჩიკვილაძის ჩაწოდებული ბურთი და აბრამიძის არაზუსტი თავური.

შესვენების შემდეგ საგრძნობლად არც თამაშის სცენარი შეცვლილა და არც ტემპერატურა. ცვლილებებმა „ტორპედო“ ოდნავ კი გამოაცოცხლა, მაგრამ მნიშვნელოვანი გარდასახვა არ მომხდარა. მოედნის ცენტრთან ორთაბრძოლები ბლომად იყო. 50-ე წუთზე, მარკოზაშვილის მიერ შორი მანძილიდან დარტყმით ბურთი მოედნის მიღმა გაფრინდა. 53-ე წუთზე, შორიდან კვლავ ჩიკვილაძემ დაუმიზნა სტუმართა კარს, შეყრილაძემ ნახტომში გადააგდო ბურთი კუთხურზე. მე-80 წუთზე, ფიფიამ საჯარიმო შეასრულა, მეკარის მხარეს გაშვებული ბურთი ხარიხას სანტიმეტრებით ასცდა. ასევე, მხოლოდ სტატისტიკაში ჩაიწერა ტაბატაძისა და მოდებაძის დარტყმები. ეს იყო და ეს, მსაჯის საფინალო სასტვენმა ნულოვანი და ლოგიკური ფრე დააფიქსირა - 0:0.
II ტური 15.08.2014 17:30 ტორპედო 0:0 დილა
I ტური 09.08.2014 17:30
კოლხეთი 0:3 ტორპედო
0:1 ნიკო კვასხვაძე 12', 0:2 ოთარ კვერნაძე 56', 0:3 თენგიზ ჩიკვილაძე 70'
მატჩის შესახებ
რიგით 57-ე რიონისპირული დერბის ხილვით კაცი არ მოიწყენდა. ორივე გუნდმა ღია თამაში აჩვენა და აქედან გამომდინარე სანახაობრივი მხარეც ნორმალური იყო. სახიფათო მომენტები თითქმის ყოველ ხუთ წუთში ერთხელ იქმნებოდა. რევაზ ძოძუაშვილის სასტარტო თერთმეტეულს შორის „ტორპედოს“ მაისურით პირველი ოფიციალური მატჩი ჩაატარეს: მეკარე მინდია ბობღიაშვილმა, ფორვარდმა გოგი ფიფიამ და 19 წლის საყრდენმა ნახევარმცველმა ალეკო ჩაკვეტაძემ. მოედანზე შეცვლაზე შევიდა 20 წლის მარცხენა მცველი ცოტნე ქებურია, რომელსაც ასევე დებიუტი ჰქონდა ჩვენს გუნდში. ამ უკანასკნელის მსგავსად მეორე ტაიმში ჩაერთო თამაშში დღევანდელი იუბილარი თეიმურაზ მარკოზაშვილიც, მას 20 წელი გახდა შეუსრულდა, „მარკოზას“ ხსენების მიზეზიც სწორედ ეს გახლდათ. ხანგრძლივი შესვენების შემდეგ უმაღლეს ლიგაში ასპარეზობა განაახლა ვაჟა ტაბატაძემ. რაც შეეხება თენგიზ ჩიკვილაძეს, იგი ქუთაისელთა ახალი კაპიტანია.

ლანჩხუთში სტადიონის ტრიბუნებზე არცთუ ისე მცირერიცხოვანი იყო ქუთაისელი ქომაგობა. საწყის წუთებში თანაბარი თამაში მიმდინარეობდა, მაგრამ „ტორპედოს“ შეტევები გაცილებით უფრო მწვავე იყო, ვიდრე „კოლხეთის“. ქუთაისელთა უკეთესობა მე-12 წუთზე გატანილ გოლში აისახა, რომლის ბოლო ფაზაში მარცხენა ფლანგზე ტუღუში ორ მოწინააღმდეგეს შორის გაძვრა და კარის წინ ჩააწოდა დაბალი ტრაექტორიით ბურთი, მეკარის საჯარიმოში მცველს ნიკო კვასხვაძემ დაასწრო ფეხით თამაში და „ტორპედოც“ ასე დაწინაურდა - 0:1. პირველ ტაიმში ორივე გუნდს შეეძლო ანგარიშის თავის სასიკეთოდ შეცვლა, უფრო მეტად კი ქუთაისელებს, რომელთა შორის ფიფია აქტიურობდა და 3-ჯერაც დაარტყა სახიფათოდ, მაგრამ უშედეგოდ. ამდენივეჯერ შეეძლო ჩიკვილაძესაც მეტოქის კარის აღება, მაგრამ მანაც ვერ მოახერხა ეს(პირველ ტაიმში). ყურადღების ქვეშ ორჯერ მოექცა ბობღიაშვილიც, ტორპედოელმა სიჭინავასა და გოგონაიას დარტყმებზე მოახდინა დროული რეაგირება.

მეორე ნახევარში თამაშის სადავეები „ტორპედოს“ ჰქონდა. ეს ოთარ კვერნაძის გოლმა განაპირობა მას შემდეგ, რაც ფიფიამ გაუკეთა პასი და მანაც მარცხენა 45-გრადუსიანი კუთხიდან მარცხენა ფეხით საგოლედ დაარტყა - 0:2. ფოთელები კიდევ უფრო მოეშვნენ და ამით ქუთაისელებს მოედანზე მეტი სივრცეები მიეცათ. 70-ე წუთზე მარკოზაშვილისგან მიღებული გადაცემა მარჯვენა მხრიდან კვასხვაძემ გადაამისამართა მეტოქის საჯარიმოში, სადაც ბურთი ქებურიამ გააჩერა, აქ მას თავადაც შეეძლო დაერტყა, მაგრამ არ იხარბა და თენგიზ ჩიკვილაძე მონახა, რომლის დარტყმით ერთ-ერთმა კოლხეთელმა კარში წასულ ბურთზე მისი გუნდის გადარჩენა სცადა, თუმცა მაინც ბადეში შევარდა იგი - 0:3. გარდა ამისა, მეკარე სეფიაშვილმა 3-ჯერ გადაარჩინა „კოლხეთი“, ორჯერ მასთან პირისპირ მყოფ კვერნაძეს მიუგერია და ერთხელაც ქებურიას დარტყმული ბურთი არ გაუშვა. „ტორპედოს“ დაცვა კი თითქმის შეუვალი იყო და ამიტომ ბობღიაშვილსაც არ უწევდა ძირითადად ხელით თამაში. ამრიგად, „ტორპედომ“ მიმდინარე ჩემპიონატი უხერხულ მეტოქესთან სოლიდური გამარჯვებით(3:0) დაიწყო.
I ტური 09.08.2014 17:30 კოლხეთი 0:3 ტორპედო
გათამაშების ცხრილი
#გუნდი
1 დილა 30 19 7 4 64
2 დინამო ბათუმი 30 18 4 8 58
3 დინამო თბილისი 30 17 7 6 58
4 სპარტაკი 30 16 5 9 53
5 ჩიხურა 30 13 7 10 46
6 სამტრედია 30 13 6 11 45
7 შუქურა 30 11 8 11 41
8 ტორპედო 30 10 11 9 41
9 გურია 30 10 9 11 39
10 კოლხეთი 30 9 10 11 37
11 მერანი 30 9 9 12 36
12 ზუგდიდი 30 8 9 13 33
13 სიონი 30 9 5 16 32
14 მეტალურგი 30 6 8 16 26
15 ვიტ ჯორჯია 30 7 5 18 26
16 ზესტაფონი 30 6 8 16 26
მომდევნო თამაში
ბოლო თამაში
მეტალურგი - ტორპედო
1:1

დაწვრილებით