თამაშები
1/8 ფინალი (მეორე) 26.11.2014 14:00
ტორპედო 3:4 მერანი
1:1 ალეკო ჩაკვეტაძე 21', 2:1 ოთარ კვერნაძე 22', 3:4 ნიკო კვასხვაძე 73' 0:1, 2:2 პაპუნა ფონიავა 6', 54', 2:3, 2:4 ბესიკ ჩიმაკაძე 57' 65'
მატჩის შესახებ
როგორც 4 დღის წინ ჩვენს ქალაქში გამართულ იმერულ დერბიზე, ისე დღესაც სტადიონზე მოსულმა პუბლიკამ საფეხბურთო სანახაობა იხილა. შეხვედრა ძლიერი ქარის ფონზე მიმდინარეობდა, რამაც სცენარზე გავლენა დიდად არ იქონია. მთავარი მსაჯის პირველ სასტვენამდე ორივე გუნდი სპეციალური მაისურებით გამოვიდა მოედანზე. გაიშალა შესაბამისი ბანერიც, რითაც ისინი შეუერთდნენ გაეროს ორგანიზაციის მოძრაობას - კაცები ქალების უფლებებისთვის(„HeForShe“).

მატჩის, რომელშიც 7 გოლი გავიდა, დეტალური მიმოხილვით თავს არ შეგაწყენთ. ვფიქრობთ ერთიანი სურათის აღსაწერად მეტყველი იქნება ისიც, რომ „ტორპედომ“ მის მიერ შექმნილი სახიფათო მომენტების მეექვსედი გამოიყენა, „მერანმა“ კი თავისი შანსების თითქმის ნახევარი, მიუხედავად ამისა რეალიზების მაჩვენებელი სტუმრებს უკეთესი ჰქონდათ. დასაწყისშივე გამოჩნდა, რომ ვლადიმერ ლობასის შეგირდები დანებებას არ აპირებდნენ. მე-6 წუთზე გატანილი გოლიც ამას მოწმობდა. დაახლოებით 30 მეტრიდან საჯარიმო დარტყმა პაპუნა ფონიავამ შეასრულა ზუსტად - 0:1. „ტორპედო“ დროულად შეეცადა ინტრიგის „გაქრობას“ და ერთწუთიან მონაკვეთში დაწინაურდა კიდეც: მე-20 წუთზე, ბაბუნაშვილმა ტრადიციულად სახიფათოდ მოაწოდა კუთხური, ბურთი ერთ-ერთი მერანელისგან ალეკო ჩაკვეტაძეს მოუვიდა, რომელმაც „ტორპედოს“ მაისურით თავისი პირველი გოლი გაიტანა. 21-ე წუთზე, ამ უკანასკნელის პასით ოთარ კვერნაძემ გამოავლინა ფორვარდისთვის საჭირო სიზუსტე - 2:1. თამაში „დაწყნარდა“, თუმცა დროებით...

მეორე ტაიმის საწყის წუთებში უპირატესობას კვლავ „ტორპედო“ ფლობდა. რევაზ ძოძუაშვილმა პირველი ცვლილება განახორციელა, რომელიც, პირდაპირ ვთქვათ, ვერ გამოიცნო, გოგიჩაიშვილის მაგივრად მოედანზე შესული ჩადუნელი თამაშში ამჯერად უიღბლოდ ჩაერთო, რის გამოც იგი ოდნავ მოგვიანებით კვასხვაძემ ჩაანაცვლა. იქამდე კი ტორპედოელებმა სამჯერ განაახლეს ცენტრიდან თამაში. 54-ე წუთზე, პაპუნა ფონიავამ მეორედაც შედეგიანი „საჯარიმო“ გაუტანა თებიძეს, რომელსაც ამ ორი გაშვებული გოლისგან საკუთარი გუნდის გადარჩენა აშკარად შეეძლო. 57-ე და 65-ე წუთებზე, მერანელმა ბესიკ ჩიმაკაძემ თავური დარტყმებით შეასრულა დუბლი - 2:4. ცხადია, მოვლენების ასეთ განვითარებას ძნელად თუ ვინმე წარმოიდგენდა. ნერვიულობამ იმატა, სიტუაცია დაიძაბა და ყვითელი ბარათებიც მომრავლდა. მიუხედავად იმისა, რომ ასეთ ანგარიშზე „ტორპედო“ გადიოდა შემდეგ ეტაპზე, ქუთაისელთა თავკაცმა ანგარიშის შენარჩუნებაზე არ ითამაშა და შეცვლაზე თავდამსხმელები: ზემოთ ნახსენები კვასხვაძე და ფიფია შეიყვანა, რომლებმაც მასპინძელთა თამაში საკმაოდ დაალაგეს. ფაქტობრივად, ამის შემდეგ „მერანს“ ღირებული აღარაფერი შეუქმნია. „ტორპედო“ კი ხშირად უტევდა და 73-ე წუთზე ნიკო კვასხვაძის გოლით სხვაობაც შემცირდა - 3:4. საბოლოოდ, ქუთაისელებმა ეს მატჩი კი დათმეს, მაგრამ პირველ შეხვედრაში მიღწეული უპირატესობის ხარჯზე(3:0) მეოთხედფინალში თამაშის უფლება მაინც დამსახურებულად მოიპოვეს.
1/8 ფინალი (მეორე) 26.11.2014 14:00 ტორპედო 3:4 მერანი
1/8 ფინალი (პირველი) 17.11.2014 14:00
მერანი 0:3 ტორპედო
0:1 თენგიზ ჩიკვილაძე 27', 0:2 ვაჟა ტაბატაძე 66', 0:3 თენგიზ ჩიკვილაძე 67'
მატჩის შესახებ
მარტვილელებთან პაექრობაში ქუთაისელებს საკადრო პრობლემები ჰქონდათ. ტრავმების გამო გუნდს ვერ ეხმარებოდნენ ბონდარენკო, ტუღუში და კვერნაძე, თუმცა მოედანზე მათ მაგივრად გამოსულმა ტორპედოელებმა წარმატებით გაართვეს თავი დაკისრებულ მოვალეობებს. თამაში სწრაფ ტემპში დაიწყო და გუნდებს დებიუტშივე არაერთი საგოლე შანსი მიეცათ გოლის გატანისა. დასაწყისიდანვე „ტორპედო“ შეტევაზე იყო ორიენტირებული და ამ ტაქტიკამ გაამართლაც კიდეც. პირველი ხიფათი ფიფიას პასით მამასახლისმა შექმნა, რომლის დარტყმულს სიძლიერე არა და სიზუსტე კი აკლდა. ამას მოჰყვა „მერანის“ ორი კარში დარტყმა, ორივეჯერ თებიძეს მოუწია თამაშში ჩართვა და სიტუაციის განმუხტვა. მე-13 წუთზე, ქებურიას გადაცემით ახლო მანძილიდან ერთი შეხებით ჩიკვილაძეს უნდა გაეხსნა ანგარიში, მაგრამ „ტორპედოს“ კაპიტნის ზეიმი გადაიდო, სულ რაღაც 14 წუთით. იქამდე კი „მერანიდან“ კიკნაველიძისა და ფონიავას, ხოლო „ტორპედოდან“ ტაბატაძისა და ფიფიას საშუალო მანძილიდან არაზუსტი დარტყმები ვიხილეთ და აი, ის გოლიც ზემოთ რომ ვახსენეთ: სტუმართა შეტევის ბოლო ფაზაში მამასახლისმა მიიღო ბურთი და მის პირდაპირ რამდენიმე მეტოქეს შორის მშვენიერი პასი გაუკეთა თენგიზ ჩიკვილაძეს, რომელიც მეკარესთან პირისპირ დარჩა და გულშემატკივრებიც გაახარა - 0:1. ცოტა ხანში შეტევაში ჩართულმა გელაშვილმა გაისროლა კარისკენ და ბურთი მის მიღმა წავიდა, ისევე, როგორც ჩიმაკაძის ორი დარტყმის მერე.

მეორე ტაიმში „ტორპედოს“ სათამაშო უპირატესობა გაიზარდა. 53-ე წუთზე, საჯარიმო დარტყმა ჩიკვილაძემ შეასრულა სახიფათოდ, ბურთს მამალაძე დაეუფლა. „მერანს“ დღევანდელ მატჩში მისთვის ყველაზე ხელყსარელი მომენტი 59-ე წუთზე შეექმნა, მაგრამ რამდენიმე მეტრიდან ბოლქვაძემ ვერ გამოიყენა გათანაბრების შესაძლებლობა. 66-ე წუთზე, „მერანის“ კართან კუთხური დაინიშნა, იგი იუბილარმა ბაბუნაშვილმა(მას დღეს 34 წელი შეუსრულდა) მოაწოდა, ბურთი გზად რამდენიმე ფეხბურთელს ასცდა და საბოლოოდ ვაჟა ტაბატაძეს მიუვიდა, რომელმაც მარცხენა კუთხეში ეფექტური დარტყმით მეკარეს შანსი არ დაუტოვა - 0:2. ეს გოლი ტაბატაძისთვის „ტორპედოში“ 4-წლიანი ასპარეზობის განმავლობაში ოფიციალურ მატჩებში მეორე გოლი გახლავთ, პირველად მან 2011 წელს ასევე თასის გათამაშებაში(1/16 ფინალში) შეძლო ახალციხის „მესხეთის“ კარის აღება. ანგარიშის სხვაობის გაზრდიდან ერთ წუთში ერთ-ერთი მერანელი მცველი მეკარეს უბრუნებდა ბურთს, მაგრამ მას პასი ოდნავ სუსტი გამოუვიდა, წინ გამოსულ მეკარეს სხარტმა ქებურიამ დაასწრო ბურთზე თამაში და იქვე თენგიზ ჩიკვილაძეს დაუგორა, მე-7 ნომერმა ზუსტად დაარტყა და დუბლიც შეასრულა - 0:3. ბუნებრივია, ამ გოლებმა მატჩში დიდი გარდატეხა შეიტანა. დაბნეული „მერანი“ ორჯერ კიდევ გადაურჩა გაშვებულ გოლს, შენგელიამ და ტაბატაძემ მცირე მანძილით ააცილეს ბურთი კარს. აღსანიშნავია, რომ უშეცდომო იყო ტორპედოელი მეკარე თებიძე. მიუხედავად იმისა, რომ დრო არცთუ ცოტა იყო დარჩენილი, ქუთაისელებმა მატჩის ბოლო ნაწილი მშვიდად ჩაატარეს და მიმდინარე ჩემპიონატში „მერანთან“ სტუმრად განცდილი მარცხისთვის(1:3) სრულფასოვანი რევანში თასზე აიღეს და შემდეგ ეტაპსაც გვარიანად მიუახლოვდნენ. პლუს, მარტვილელთა 7-მატჩიან წაუგებელ სერიასთან ერთად საკუთარი 5-მატჩიანი მოუგებელი სერიაც ღირსეულად შეწყვიტეს.
1/8 ფინალი (პირველი) 17.11.2014 14:00 მერანი 0:3 ტორპედო
1/16 ფინალი (მეორე) 01.10.2014 15:00
ტორპედო 5:2 ჩხერიმელა
1:0 ნიკო კვასხვაძე 5', 2:0 თენგიზ ჩიკვილაძე 16', 3:0, 4:1, 5:2 გოგი ფიფია 34', 68', 76' 3:1 ლაშა გაბრიჭიძე 59', 4:2 ირაკლი გვეტაძე 71'
მატჩის შესახებ
მიუხედავად იმისა, რომ გუნდების პირველი ურთიერთშეხვედრა ქუთაისელებს ჰქონდათ მოგებული, რა გასაკვირია, რომ „ტორპედო“ ამჯერადაც გასამარჯვებლად იყო შემართული. რევაზ ძოძუაშვილმა დღეს ძირითადი შემადგენლობის რამდენიმე ფეხბურთელი დაასვენა. უნდა ითქვას დებიუტანტებზეც, რომლებმაც „ოფიციალურში“ პირველად იასპარეზეს რიონოსპირელთა რიგებში: შეუცვლელად ითამაშა მეკარე საბა ცაბუტაშვილმა, ხოლო მეორე ტაიმში შევიდნენ მოედანზე: ლევან შენგელია, გურამ თედიაშვილი და გივი დუდუჩავა. გუნდების დონეებს შორის სხვაობა მატჩის დებიუტშივე გახდა შესამჩნევი. თავიდან, ანგარიში მხოლოდ ჩვენი გუნდის სასარგებლოდ იცვლებოდა: მე-5 წუთზე, ბენაშვილის პასით ნიკო კვასხვაძემ გაიტანა, მე-16-ზე თენგიზ ჩიკვილაძემ გაახვია ბურთი ბადეში უძლიერესი შორეული დარტყმით, 34-ე წუთზე კი ტაბატაძის პასით გოგი ფიფიამ „ტორპედოს“ ოფიციალურ მატჩებში გახსნა საკუთარი გოლების ანგარიში - 3:0. ბუნებრივია, ქუთაისელთა ასეთი უპირატესობა არანაირ კითხვის ნიშნებს აღარ ტოვებდა.

ტაიმებს შორის შესვენების შემდეგ სტუმრები ოდნავ გააქტიურდნენ, ამას 59-ე წუთზე ერთი საპასუხო გოლი მოჰყვა, რომელიც თავური დარტყმით ლაშა გაბრიჭიძემ გაიტანა - 3:1, თუმცა 68-ე წუთზე გოგი ფიფიამ საჯარიმოს გარედან ტექნიკური დარტყმით ისევ სამბურთიანი გახადა ანგარიშის სხვაობა - 4:1. ეს ციფრები დიდხანს არ ყოფილა ძალაში, აქედან სამ წუთში ირაკლი გვეტაძემაც მოახერხა კარის აღება - 4:2. 76-ე წუთზე კი გოგი ფიფიამ კიდევ ერთხელ დალაშქრა მეტოქის კარი და ჰეთ თრიკიც შეასრულა - 5:2. გოლების გარდა შეხვედრა გაცუდებული საგოლე მომენტებითაც იყო დახუნძლული. ამრიგად, „ტორპედომ“ ორი მატჩის ჯამში ანგარიშით 6:2 დაამარცხა „ჩხერიმელა“ და თასის გათამაშების დაგეგმილი 1/8 ფინალის საგზურიც უპრობლემოდ მიიღო.
1/16 ფინალი (მეორე) 01.10.2014 15:00 ტორპედო 5:2 ჩხერიმელა
1/16 ფინალი (პირველი) 20.08.2014 17:00
ჩხერიმელა 0:1 ტორპედო
0:1 ცოტნე ქებურია 55'
მატჩის შესახებ
დღევანდელ შეხვედრაში „ტორპედოს“ მაისურით პირველი ოფიციალური მატჩი გამართეს: გაბრიელ თებიძემ, ალექსი ბენაშვილმა და გიორგი გიორგაძემ. ჩვენს გუნდში დაბრუნების შემდეგ ასევე პირველად იასპარეზა შოთა ბაბუნაშვილმა. პირველლიგელ იმერლებთან პაექრობა საშუალო ტემპში დაიწყო. მართალია, დაძაბულობა თან ახლდა მას, თუმცა ხეირიანი იერიშები იშვიათად ხორციელდება. „ჩხერიმელას“ შემადგენლობაში ყველაზე მეტად ექსმერანელი ლეგიონერი რაფაელ ჩუკურანი აქტიურობდა, რომელსაც ტორპედოელები მუდამ მზადყოფნაში ჰყავდა. პირველ ტაიმში თებიძეს ორჯერ მოუწია ნახტომის გაკეთება, ორივე შემთხვევაში მან მეტოქეთა დარტყმულის შემდეგ კუთხურზე გადააგდო ბურთები. ერთხელაც 19 წლის მეკარემ ადგილზე გამოავლინა კარგი რეაქცია. „ტორპედოს“ მასპინძელთა კართან მიახლოებას კი ხიფათი ვერ მოჰქონდა, შესაბამისად, მცირე უპირატესობაც ზემოიმერელთა მხარეს იყო. მიუხედავად ამისა, სტუმრებმა გაიტანეს, ოღონდ თამაშგარედან, ბენაშვილის შესრულებული საჯარიმოთი ბურთი „ცოცხალ კედელს“ მოხვდა და ჭედიას მიუვიდა, ამ უკანასკნელმაც ბადე შეარხია, მაგრამ გვერდით მსაჯს ამ დროს ალამი აწეული ჰქონდა და გოლიც გაუქმდა.

ტაიმებს შორის შესვენების შემდეგ „ტორპედო“ უფრო სწრაფად აგორებდა ბურთს და შეტევებზეც მეტად იყო ორიენტირებული, ამან მალევე გამოიღო შედეგი. 55-ე წუთზე, მარჯვენა ფლანგზე ბურთი ჭედიამ დაამუშავა, ამავე მხრიდან საჯარიმოში შეიჭრა და კარის გასწვრივ დაბალი ტრაექტორიით გააკეთა გადაცემა, ვარდნაში მას მოედანზე 3 წუთის წინ შესული ცოტნე ქებურია გამოეხმაურა, 19 წლის ფეხბურთელმა ოპონენტს წამით დაასწრო რეაგირება და კარში გადაამისამართა ბურთი, რომელმაც კარის ხაზი სულ მცირედიდ გადაკვეთა და მსაჯმაც ცენტრისკენ გაიშვირა ხელი - 0:1. დაწინაურებამ ქუთაისელებზე დადებითად იმოქმედა და აქედან ორ წუთში, ფიფიას აუღო მეკარემ ბურთი. 67-ე წუთზე, ჭედიას პასით ბაბუნაშვილი ურტყამდა მეკარისგან დაუცველ კარში, თუმცა ბურთი ერთ-ერთმა მცველმა მოიგერია. მალევე მამასახლისმა დაჰკრა ბურთს შორიდან, მაგრამ მიზანს ააცილა. შემდეგ კვერნაძეს ქუსლით უნდოდა გატანა, მაგრამ არ გამოუვიდა. დარჩენილ დროში „ჩხერიმელას“ გათანაბრების შანსები მიეცა, მაგრამ ხარაგაულელებმა ვერც ერთი მათგანი ვერ გამოიყენეს. ეს, ერთი შეხედვით, ჩვეულებრივი შეხვედრა ბოლო ნაწილში ამინდმა „გახადა“ უფრო სამახსოვრო... ტრიბუნებზე შეკრებილ რამდენიმე ასეულ გულშემატკივართა უმეტესობა, რომელთა შორის „ტორპედოს“ ქომაგთა კლუბი „ჯუნგლებიც“ იყო, არც მას მერე დაშლილა, რაც თამაშის დასრულებამდე 20 წუთით ადრე ხარაგაულში თქეში წამოვიდა, ამას ემატებოდა ძალზედ ცუდი ხილვადობა და მინდორზე დამდგარი წყლის გუბეები, რაც ფეხბურთის თამაშის საშუალებას არ იძლეოდა და ბოლო წუთები ფეხბურთელებისთვის ნამდვილ წვალებად იქცა. საბოლოოდ, „ტორპედომ“ მატჩი მინიმალური ანგარიშით გამარჯვებამდე მიიყვანა(1:0). აღნიშნულ ეტაპზე გუნდებს შორის საპასუხო მატჩი სექტემბერში გაიმართება, ჩემპიონატის კალენდარში შესული ცვლილებების გამო, ჯერჯერობით ზუსტი თარიღი უცნობია.
1/16 ფინალი (პირველი) 20.08.2014 17:00 ჩხერიმელა 0:1 ტორპედო
გათამაშების ცხრილი
#გუნდი
1 დინამო თბილისი 15 9 2 4 29
2 დილა 15 8 4 3 28
3 სამტრედია 15 7 4 4 25
4 დინამო ბათუმი 15 7 3 5 24
5 სპარტაკი 15 7 3 5 24
6 მეტალურგი 15 6 5 4 23
7 ჩიხურა 15 6 4 5 22
8 მერანი 15 5 5 5 20
9 ზესტაფონი 15 4 7 4 19
10 გურია 15 4 7 4 19
11 შუქურა 15 4 6 5 18
12 კოლხეთი 15 4 5 6 17
13 ტორპედო 15 3 7 5 16
14 სიონი 15 3 5 7 14
15 ვიტ ჯორჯია 15 3 3 9 12
16 ზუგდიდი 15 2 6 7 12
მომდევნო თამაში
ბოლო თამაში
ტორპედო - მეტალურგი
0:1

დაწვრილებით